Read gungbe PSALM 49 Bible Online

PSALM 49 - gungbe bible

PSALM 49

¹Ku ji wannan, ko wannenku, Ku saurara jama'a duka na ko'ina,

²Da manya da ƙanana duka ɗaya, Da attajirai da matalauta baki ɗaya.

³Zan yi magana da hikima, Zan yi tunani mai ma'ana.

⁴Zan mai da hankalina ga ka-cici-ka-cici, In bayyana ma'anarsa sa'ad da nake kaɗa molo.

⁵Don me zan ji tsoro a lokacin hatsari, Sa'ad da mugaye suka kewaye ni,

⁶Mutanen da suke dogara ga dukiyarsu, Waɗanda suke fariya saboda yawan wadatarsu?

⁷Har abada mutum ba zai iya fansar wani ba, Ba kuwa zai iya biyan kuɗin ransa ga Allah ba.

⁸Gama kuɗin biyan ran mutum ba shi da iyaka. Abin da zai iya biya, sam ba zai isa ba,

⁹Ba kuwa zai rayar da shi, Ko ya hana shi mutuwa har abada ba.

¹⁰Yakan sa masu hikima su ma su mutu, Haka nan ma wawaye da mutanen banza, Za su mutu su bar dukiyarsu ga zuriyarsu.

¹¹Kaburburansu za su zama gidajensu har abada, Can za su kasance kullum, Ko da yake a dā suna da ƙasa ta kansu.

¹²Girman mutum ba zai hana shi mutuwa ba, Zai mutu kamar dabba.

¹³Dubi abin da zai faru ga waɗanda suke dogara ga kansu, Da irin ƙaddarar waɗanda dukiya ta ishe su.

¹⁴Za a ƙaddara su ga mutuwa kamar tumaki, Mutuwa ce za ta yi kiwonsu. Da safe adalai za su ci nasara a kansu, Sa'ad da gawawwakinsu suke ruɓewa a ƙasar matattu, Nesa da gidajensu.

¹⁵Amma Allah zai fanshe ni, Zai ɗauke ni daga ikon mutuwa.

¹⁶Kada ka damu sa'ad da mutum ya zama attajiri, Ko kuwa dukiyarsa ta ƙasaita,

¹⁷Domin ba zai ɗauke ta a lokacin mutuwarsa ba, Dukiyarsa ba za ta shiga kabari tare da shi ba.

¹⁸Ko da a ce mutum ya sami falalar wannan rai, Ana kuwa ta yabonsa saboda nasarar da ya ci,

¹⁹Duk da haka zai tarar da kakanninsa waɗanda suka mutu, Inda duhu ya dawwama har abada.

²⁰Girman mutum ba zai hana shi mutuwa ba, Zai mutu kamar dabba.