Read gungbe PSALM 50 Bible Online

PSALM 50 - gungbe bible

PSALM 50

¹Allah Maɗaukaki, Ubangiji, ya yi magana, Yana kiran dukan duniya, daga gabas zuwa yamma.

²Allah yana haskakawa daga Sihiyona, Da cikar jamalin Sihiyona.

³Allahnmu ya zo, ba a ɓoye yake ba, Wuta mai cinyewa na tafe a gabansa, Babban hadiri kuwa na kewaye da shi.

⁴Ya kira sammai da duniya su zama shaidu, Su ga yadda yake shara'anta jama'arsa.

⁵Ya ce, “Ku tattaro mini amintattuna, Waɗanda suka cika alkawarin da yake tsakanina da su, Ta wurin miƙa hadaya.”

⁶Sammai suna shelar adalcin Allah, Domin shi yake yin shari'a!

⁷“Ku ji, ya ku jama'ata, zan kuwa yi magana, Zan ba da shaida gāba da ku, ya Isra'ila. Ni ne Allah, Allahnku.

⁸Ban tsauta muku saboda hadayunku ba, Ko saboda hadayu na ƙonawa da kuke ta miƙa mini kullum.

⁹Ba na bukatar bijimai daga gonakinku, Ko awaki daga garkunanku.

¹⁰Gama namomin jeji nawa ne, Dubban shanu da suke kan tuddai kuma nawa ne.

¹¹Dukan tsuntsayen da suke tashi a sararin sama nawa ne, Da dukan masu rai da suke ƙasa.

¹²“Da ina jin yunwa ba sai na faɗa muku ba, Gama da duniya da dukan abin da yake cikinta nawa ne.

¹³Nakan ci naman bijimai ne? Ko nakan sha jinin awaki?

¹⁴Bari ku miƙa wa Allah hadayarku ta godiya, Ku ba Mai Iko Dukka, dukan hadayun da kuka alkawarta.

¹⁵Ku yi kira gare ni sa'ad da wahala ta zo, Zan cece ku, Ku kuwa za ku yabe ni.”

¹⁶Amma Allah ya ce wa mugaye, “Don me za ku haddace umarnaina? Don me za ku yi magana a kan alkawaraina?

¹⁷Kun ƙi in tsauta muku, Kun yi watsi da umarnaina.

¹⁸Sa'ad da kuka ga ɓarawo kukan yi abuta da shi. Kuna haɗa kai da mazinata.

¹⁹“Kullum a shirye kuke ku hurta mugunta, Ba ku jin nauyin faɗar ƙarya.

²⁰A shirye kuke ku sari 'yan'uwanku, Ku sa musu laifi.

²¹Kun aikata waɗannan duka, ni kuwa ban ce kome ba, Saboda haka kuka zaci ni kamar ku nake. Amma yanzu zan tsauta muku, In bayyana muku al'amarin a fili.

²²“Ku ji wannan ku da kuke ƙyale ni, In ba haka ba zan hallaka ku, Ba wanda zai cece ku.

²³Wanda yake yin godiya a sa'ad da yake miƙa hadayarsa, yana girmama ni, Da wanda yake yi mini biyayya kuma, zan nuna masa cetona.”