Read gungbe PSALM 55 Bible Online

PSALM 55 - gungbe bible

PSALM 55

¹Ka ji addu'ata, ya Allah, Kada ka ƙi jin roƙona!

²Ka saurare ni, ka amsa mini, Gama damuwata ta gajiyar da ni tiƙis.

³Hankalina ya tashi saboda yawan kurarin maƙiyana, Saboda danniyar mugaye. Sukan jawo mini wahala, Suna jin haushina suna ƙina.

⁴Azaba ta cika zuciyata, Tsorace-tsoracen mutuwa sun yi mini nauyi.

⁵Tsoro da rawar jiki sun kama ni, Na cika da razana.

⁶Na ce, “Da a ce ina da fikafikai kamar kurciya, Da sai in tashi, in tafi, in nemi wurin hutawa!

⁷In tafi can nesa, In yi wurin zamana a hamada.

⁸Zan hanzarta in nemi mafaka Daga iska mai ƙarfi da hadiri.”

⁹Ka hallaka su, ya Ubangiji, ka birkitar da maganarsu, Gama na ga hargitsi da tawaye a birni.

¹⁰Dare da rana suna ta yawo a kan garu suna ta kewaye birnin, Birnin kuwa cike yake da laifi da wahala.

¹¹Akwai hallaka a ko'ina, Tituna suna cike da azzalumai da 'yan danfara.

¹²Da a ce maƙiyina ne yake mini ba'a, Da sai in jure. Da a ce abokin gābana ne yake shugabancina, Da sai in ɓuya masa.

¹³Amma kai ne, aminina, Abokin aikina ne, abokina ne kuma!

¹⁴Dā mukan yi taɗi da juna ƙwarai, Mukan tafi Haikali tare da sauran jama'a.

¹⁵Allah ya sa mutuwa ta auko wa maƙiyana ba labari, Allah ya sa su gangara ƙasar matattu da ransu! Mugunta tana cikin gidajensu da zukatansu.

¹⁶Amma ina kira ga Allah, yă taimake ni, Ubangiji kuwa zai cece ni.

¹⁷Koke-kokena da nishe-nishena Suna hawa zuwa gare shi da safe, da tsakar rana, da dad dare, Zai kuwa ji muryata.

¹⁸Zai fisshe ni lafiya Daga yaƙe-yaken da nakan yi da magabtana masu yawa.

¹⁹Allah, shi wanda yake mulki tun fil azal, Zai ji ni, zai kore su. Ba abin da suka iya yi a kai, Domin ba su tsoron Allah.

²⁰Abokina na dā, Ya yi wa abokansa faɗa, Ya ta da alkawarinsa.

²¹Kalmominsa sun fi mai taushi, Amma ƙiyayya tana a zuciyarsa, Kalmominsa sun fi mai sulɓi, Amma suna yanka kamar kakkaifan takobi.

²²Ka gabatar da wahalarka ga Ubangiji, Zai kuwa taimake ka, Ba zai bari a ci nasara a kan mutumin kirki ba, faufau.

²³Amma kai, ya Allah, za ka jefar da masu kisankai, da maƙaryata can ƙasa cikin zurfafa, Kafin su kai rabin kwanakinsu a duniya. Amma ni, zan dogara gare ka.