Read gungbe PSALM 66 Bible Online

PSALM 66 - gungbe bible

PSALM 66

¹Ku yabi Allah da babbar murya ta farin ciki, Ya jama'a duka!

²Ku raira waƙar darajar sunansa, Ku yabe shi da ɗaukaka!

³Ku faɗa wa Allah cewa, “Al'amuran da kake aikatawa Suna da banmamaki ƙwarai! Ikonka yana da girma ƙwarai, Har maƙiyanka sukan durƙusa a gabanka don tsoro.

⁴Duk wanda yake a duniya, yana yi maka sujada, Yana raira maka waƙar yabbai, Yana raira yabbai ga sunanka.”

⁵Zo, ka ga abin da Allah ya yi, Ayyukansa masu ban al'ajabi Waɗanda ya aikata ga mutane.

⁶Ya sa teku ta zama busasshiyar ƙasa, Kakanninmu suka haye kogi da ƙafa. A can muka yi farin ciki saboda abin da ya yi.

⁷Har abada yana mulki ta wurin ƙarfinsa, Yana duban al'ummai, Don kada 'yan tawaye su tayar masa!

⁸Ku yabi Allahnmu, ya ku dukan al'ummai, Bari a ji yabon da kuke yi masa.

⁹Shi ne yake rayar da mu, Bai kuwa yarda mu fāɗi ba.

¹⁰Ka jarraba mu, ya Allah, Kamar yadda ake tace azurfa da wuta, Haka nan ka jarraba mu.

¹¹Ka bar mu muka fāɗa a tarko, Ka ɗora mana kaya masu nauyi.

¹²Ka bar maƙiyanmu suka tattaka mu, Mun ratsa ta cikin wuta da rigyawa, Amma yanzu ka kawo mu a lafiyayyen wuri.

¹³Zan kawo hadayun ƙonawa a ɗakinka, Zan miƙa maka abin da na alkawarta.

¹⁴Zan ba ka abin da na ce zan bayar, A lokacin da nake shan wahala.

¹⁵Zan miƙa tumaki don a ƙona a kan bagade, Nan za a ji ƙanshi mai daɗi na ƙonannun awaki, Zan miƙa hadayu na bijimai da na awaki.

¹⁶Ku zo ku ji, dukanku, ku da kuke girmama Allah, Ni kuwa zan faɗa muku abin da ya yi mini.

¹⁷Na yi kira gare shi neman taimako, A shirye nake in yabe shi da waƙoƙi.

¹⁸Da ban watsar da zunubaina ba, Da Ubangiji bai ji ni ba.

¹⁹Amma hakika Allah ya ji ni, Ya saurari addu'ata.

²⁰Ina yabon Allah, Domin bai ƙi addu'ata ba, Bai kuwa hana mini madawwamiyar ƙaunarsa ba.