Read gungbe PSALM 78 Bible Online

PSALM 78 - gungbe bible

PSALM 78

¹Ku kasa kunne ga koyarwata, ya ku jama'ata, Ku kula da abin da nake faɗa.

²Zan yi magana da ku, In faɗa muku asirai na dā,

³Abubuwan da muka ji muka kuwa sani, Waɗanda kakanninmu suka faɗa mana.

⁴Ba za mu ɓoye waɗannan abubuwa daga 'ya'yanmu ba, Amma za mu faɗa wa tsara mai zuwa Labarin ikon Ubangiji, da manya manyan ayyukansa, Da abubuwan banmamaki waɗanda ya aikata.

⁵Ya ba da dokoki ga jama'ar Isra'ila, Da umarnai ga zuriyar Yakubu. Ya ba kakanninmu ka'idodi, Don su koya wa 'ya'yansu dokokinsa,

⁶Saboda tsara mai zuwa ta koye su, Su kuma su koya wa 'ya'yansu.

⁷Ta haka su ma za su dogara ga Allah, Ba za su manta da abin da ya yi ba, Amma a kullum za su riƙa biyayya da umarnansa.

⁸Kada su zama kamar kakanninsu, Jama'ar 'yan tawaye marasa biyayya. Ba su taɓa dogara ga Ubangiji da zuciya ɗaya ba, Ba su kuwa yi masa aminci ba.

⁹Ifraimawa waɗanda suka yi yaƙi da bakkuna da kibau Suka gudu a ranar yaƙi.

¹⁰Ba su kiyaye alkawarinsu da Allah ba, Sun ƙi biyayya da dokokinsa.

¹¹Sun manta da abin da ya aikata, Da mu'ujizan nan da ya nuna musu.

¹²Kakanninsu na kallo sa'ad da Allah ya aikata wata mu'ujiza A filin Zowan a ƙasar Masar.

¹³Ya raba teku, ya ratsa da su ta cikinta, Ya sa ruwa ya tsaya kamar bango.

¹⁴Da rana sai ya bi da su da girgije, Da dare kuwa ya bi da su da hasken wuta.

¹⁵Ya tsaga duwatsu, suka buɗe a hamada, Ya ba su ruwa daga cikin zurfafa.

¹⁶Ya sa rafi ya fito daga cikin dutse, Ya sa ruwan ya yi gudu kamar a kogi.

¹⁷Amma sun ci gaba da yi wa Allah zunubi, A hamada suka yi wa Maɗaukaki tawaye.

¹⁸Da gangan suka jarraba Allah, Da suka ce ya ba su irin abincin da suke so.

¹⁹Suka yi magana gāba da Allah, suka ce, “Ko Allah yana da iko ya ba mu abinci a hamada?

²⁰Gaskiya ce, ya bugi dutse, Ruwa kuwa ya fito a yalwace, Amma ko yana da iko ya ba da abinci da nama ga jama'arsa?”

²¹Saboda haka Allah ya yi fushi sa'ad da ya ji su, Ya aukar wa jama'arsa da wuta, Fushinsa ya haɓaka a kansu,

²²Saboda ba su amince da shi ba, Ba su kuma gaskata yana da ikon cetonsu ba.

²³Amma ya yi magana da sararin sama, Ya umarci ƙofofinsa su buɗe,

²⁴Ya ba su tsaba daga sama, Da ya sauko musu da manna, su ci.

²⁵Ta haka suka ci abincin mala'iku. Allah ya ba su iyakar abin da za su iya ci.

²⁶Sa'an nan sai ya sa iskar gabas ta hura, Da ikonsa kuma ya sa iskar kudu ta tashi.

²⁷Ya aika da tsuntsaye bisansu kamar ƙura, Yawansu kamar yashi a gaɓa,

²⁸Sai suka fāɗo a zango, Kewaye da alfarwai ko'ina.

²⁹Sai mutane suka ci suka ƙoshi, Allah ya ba su iyakar abin da suke bukata.

³⁰Amma sa'ad da suke cikin ci, Tun ba su ƙoshi ba,

³¹Sai Allah ya yi fushi da su. Ya karkashe ƙarfafan mutane, Da samarin Isra'ila na gaske!

³²Ko da yake ya aikata mu'ujizai da yawa, Duk da haka jama'a suka ci gaba da yin zunubi, Ba su kuwa gaskata shi ba.

³³Ta haka ya ƙare kwanakinsu kamar fitar numfashi, Bala'i ya aukar wa rayukansu farat ɗaya.

³⁴Amma sa'ad da ya kashe waɗansunsu, Sai sauran suka juyo gare shi suka tuba, Suka yi addu'a sosai a gare shi.

³⁵Sun tuna, ashe, Allah ne mai kiyaye su, Sun tuna Maɗaukaki shi ne Mai Fansarsu.

³⁶Amma maganganunsu duka ƙarya ne, Dukan abin da suka faɗa kuwa daɗin baki ne kawai.

³⁷Ba su yi masa biyayya ba, Ba su yi aminci game da alkawarin da suka yi da shi ba.

³⁸Amma Allah ya yi wa jama'arsa jinƙai, Ya gafarta zunubansu, Bai hallaka su ba. Sau da yawa yakan kanne fushinsa, Ya dakatar da hasalarsa.

³⁹Yakan tuna su mutane ne kawai, Kamar iskar da take hurawa ta wuce .

⁴⁰Sau da yawa suka tayar masa a hamada. Sau da yawa suka sa shi yin ɓacin rai!

⁴¹Suka yi ta jarraba Allah a kai a kai, Suka kuwa sa Mai Tsarki na Isra'ila yin fushi.

⁴²Suka manta da ikonsa mai girma. Suka manta da lokacin da ya cece su daga abokan gābansu,

⁴³Lokacin da ya aikata manyan ayyuka da mu'ujizai A filin Zowan, ta ƙasar Masar.

⁴⁴Ya mai da koguna su zama jini, Masarawa kuwa suka kasa sha daga rafuffukansu.

⁴⁵Ya aiko da ƙudaje gare su, suka wahalshe su, Kwaɗi suka lalata filayensu.

⁴⁶Ya aiko da gamzari don su ci amfanin gonakinsu, Ya aiko da ɗango su lalata gonakinsu.

⁴⁷Ya kashe kurangar inabinsu da ƙanƙara, Ya kuma kashe itatuwan ɓaurensu da jaura.

⁴⁸Ya karkashe shanunsu da ƙanƙara, Ya kuma karkashe garkunan tumakinsu da na awakinsu da tsawa.

⁴⁹Ya buge su da fushinsa mai zafi, da hasalarsa, Ya sa su damuwa ƙwarai, Da ya aiko da mala'iku masu hallakarwa.

⁵⁰Bai kanne fushinsa ba, Bai bar su da rai ba, Amma ya karkashe su da annoba.

⁵¹Ya karkashe 'yan fari maza Na dukan iyalan da suke Masar.

⁵²Sa'an nan ya bi da jama'arsa Kamar makiyayi, ya fito da su, Ya yi musu jagora cikin hamada.

⁵³Ya bi da su lafiya, ba su kuwa ji tsoro ba, Amma teku ta cinye abokan gābansu.

⁵⁴Ya kawo su tsattsarkar ƙasarsa, Ya kawo su a duwatsun da shi kansa ya ci da yaƙi.

⁵⁵Ya kori mazaunan wurin sa'ad da jama'arsa suka dirkako, Ya rarraba ƙasar ga kabilan Isra'ila, A nan ya ba su izini su zauna a wurin, a cikin alfarwansu.

⁵⁶Amma sai suka yi wa Allah Mai Iko Dukka tawaye, Suka jarraba shi. Ba su kiyaye dokokinsa ba,

⁵⁷Amma suka yi tawaye da rashin aminci Kamar kakanninsu, Kamar kiban da aka harba da tanƙwararren baka, Waɗanda ba su da tabbas.

⁵⁸Suka sa shi ya yi fushi saboda Masujadansu na arnanci. Suka sa ya ji kishi saboda gumakansu.

⁵⁹Allah ya yi fushi sa'ad da ya ga haka, Don haka ya rabu da jama'arsa ɗungum.

⁶⁰Ya bar alfarwarsa da take a Shilo, Wato wurin da yake zaune a dā, a tsakiyar mutane.

⁶¹Ya yardar wa abokan gāba su ƙwace akwatin alkawari, Inda aka ga ikonsa da darajarsa,

⁶²Ya ji fushi da jama'arsa, Ya bar abokan gābansu su karkashe su.

⁶³Aka karkashe samari a cikin yaƙi, 'Yan mata kuma suka rasa ma'aura.

⁶⁴Aka karkashe firistoci da takuba, Matansu ba su yi makoki dominsu ba.

⁶⁵Daga bisani sai Ubangiji ya tashi Kamar wanda ya farka daga barci, Kamar jarumi wanda ya bugu da ruwan inabi.

⁶⁶Ya tura abokan gābansa baya, Da mummunar kora mai bankunya Da ba za su sāke tashi ba.

⁶⁷Ubangiji ya rabu da zuriyar Yusufu, Bai kuma zaɓi kabilar Ifraimu ba.

⁶⁸A maimakonsu sai ya zaɓi kabilar Yahuza. Ya zaɓi Dutsen Sihiyona, wanda yake ƙauna ƙwarai.

⁶⁹A can ya gina Haikalinsa, Kamar wurin zamansa a Sama. Ya kafa shi da ƙarfi kamar duniya, Tabbatacce a kowane lokaci.

⁷⁰Ya zaɓi bawansa Dawuda, Ya ɗauko shi daga wurin kiwon tumaki,

⁷¹Ya ɗauko shi daga inda yake lura da 'yan raguna. Ya naɗa shi Sarkin Isra'ila, Ya naɗa shi makiyayin jama'ar Allah.

⁷²Dawuda kuwa ya lura da su da zuciya ɗaya, Da gwaninta kuma ya bi da su.