Read gungbe PSALM 81 Bible Online

PSALM 81 - gungbe bible

PSALM 81

¹Ku yi sowa ta farin ciki ga Allah Mai Cetonmu, Ku raira yabbai ga Allah na Yakubu!

²A fara waƙa, ku buga bandiri, Ku yi waƙoƙi masu daɗi da molaye, da garayu.

³Ku busa ƙaho domin idin, A amaryar wata, Da a tsakiyar farin wata.

⁴Wannan doka ce a Isra'ila, Umarni ne kuma daga Allah na Yakubu.

⁵Ya ba da wannan umarni ga jama'ar Isra'ila, A lokacin da ya fita gāba da ƙasar Masar. Na ji wata murya da ban saba ji ba tana cewa,

⁶“Na ɗauke muku kayayyaki masu nauyi da kuke ɗauke da su a kā, Na sa kuka ajiye kwandunan aikinku.

⁷Sa'ad da kuke shan wahala Kuka yi kira a gare ni, na kuwa cece ku. Daga maɓuyata cikin hadiri, na amsa muku, Na jarraba ku a maɓuɓɓugan Meriba.

⁸“Ya kuma jama'ata Isra'ila ku kasa kunne, Ina kuwa so ku saurara gare ni.

⁹Faufau kada ku bauta wa gumaka, Ko ku yi sujada ga wanina.

¹⁰Ni ne Ubangiji Allahnku, Wanda ya fisshe ku daga ƙasar Masar. Ku buɗe bakinku, zan ciyar da ku.

¹¹“Amma jama'ata ba su kasa kunne gare ni ba. Isra'ila ta ƙi yi mini biyayya.

¹²Saboda haka na bar su su yi ta kangarewarsu, Su aikata duk irin abin da suka ga dama.

¹³Ina kuwa so jama'ata su kasa kunne gare ni, Su kuwa yi mini biyayya!

¹⁴Da sai in kori abokan gābansu nan da nan, In yi nasara da dukan maƙiyansu.

¹⁵Maƙiyana, za su sunkuya a gabana saboda tsoro, Hukuncinsu na har abada ne.

¹⁶Zan ciyar da ku da kyakkyawar alkama, In ƙosar da ku da zuma.”