Read gungbe PSALM 89 Bible Online

PSALM 89 - gungbe bible

PSALM 89

¹Ya Ubangiji zan raira waƙar Madawwamiyar ƙaunarka koyaushe, Zan yi shelar amincinka a dukan lokaci.

²Na sani ƙaunarka za ta dawwama har abada, Amincinka kuma tabbatacce ne kamar sararin sama.

³Ka ce, “Na yi alkawari da mutumin da na zaɓa, Na yi wa bawana Dawuda alkawari cewa,

⁴‘Daga zuriyarka kullum za a sami sarki, Zan kiyaye mulkinka har abada.’ ”

⁵Talikan da suke Sama suna raira waƙa a kan Abubuwan banmamakin da kake yi, Suna raira waƙa kan amincinka, ya Ubangiji.

⁶Ba wani kamarka a Sama, ya Ubangiji, Ba wani daga su cikin talikai da yake daidai da kai.

⁷Ana girmama ka a cikin majalisar talikai, Duk waɗanda suke kewaye da kai suna yin tsoronka ƙwarai.

⁸Ya Ubangiji Allah, Mai Runduna, Ba wani mai iko kamarka, Kai mai aminci ne a kowane abu.

⁹Kai kake mulkin haukan teku, Kakan kwantar da haukan raƙuman ruwa.

¹⁰Ka ragargaza dodon nan Rahab, ka kashe shi, Da ƙarfin ikonka ka cinye maƙiyanka.

¹¹Duniya taka ce, haka ma samaniya taka ce, Kai ne ka halicci duniya da dukan abin da yake cikinta.

¹²Kai ne ka yi kudu da arewa, Dutsen Tabor da Dutsen Harmon Suna raira waƙa gare ka don farin ciki.

¹³Kai kake da iko! Kai kake da ƙarfi!

¹⁴A gaskiya da adalci aka kafa mulkinka, Akwai ƙauna da aminci a dukan abin da kake yi.

¹⁵Masu farin ciki ne jama'ar da suke yi maka sujada, suna raira waƙoƙi, Waɗanda suke zaune a hasken alherinka.

¹⁶Suna murna dukan yini saboda da kai, Suna kuwa yabonka saboda alherinka.

¹⁷Kana sa mu ci babbar nasara, Da alherinka kakan sa mu yi rinjaye,

¹⁸Sabili da ka zaɓar mana mai kāre mu, Kai, Mai Tsarki na Isra'ila, Kai ne ka ba mu sarkinmu.

¹⁹Ka faɗa wa amintattun bayinka a wahayin da ka nuna musu tun da daɗewa, ka ce, “Na sa kambin sarauta a kan shahararren soja, Na ba da gadon sarauta ga wanda aka zaɓa daga cikin jama'a.

²⁰Na zaɓi bawana Dawuda, Na naɗa shi sarkinku.

²¹Ƙarfina zai kasance tare da shi, Ikona kuma zai ƙarfafa shi.

²²Abokan gābansa ba za su taɓa cin nasara a kansa ba, Mugaye ba za su kore shi ba.

²³Zan ragargaza magabtansa, In karkashe duk waɗanda suke ƙinsa.

²⁴Zan ƙaunace shi kullum, in amince da shi, Zan sa ya yi nasara kullayaumin.

²⁵Zan faɗaɗa mulkinsa tun daga Bahar Rum, Har zuwa Kogin Yufiretis.

²⁶Zai ce mini, ‘Kai ubana ne da Allahna, Kai ne kake kiyaye ni, kai ne Mai Cetona.’

²⁷Zan maishe shi ɗan farina, Mafi girma daga cikin dukan sarakuna.

²⁸Zan riƙa ƙaunarsa har abada, Alkawarin da na yi da shi kuma zai tabbata har abada.

²⁹A kullayaumin daga cikin zuriyarsa ne za a naɗa sarki, Mulkinsa zai dawwama kamar sararin sama.

³⁰“Amma idan zuriyarsa sun ƙi yin biyayya da shari'ata, Ba su kuwa zauna cikin ka'idodina ba,

³¹In sun ƙyale koyarwata, Ba su kiyaye umarnaina ba,

³²To, sai in hukunta su saboda zunubansu, Zan bulale su saboda laifofinsu.

³³Amma fa, ba zan daina ƙaunar Dawuda ba, Ba kuwa zan rasa cika alkawarin da na yi masa ba.

³⁴Ba zan keta alkawarin da na yi masa ba, Ba zan soke ko ɗaya daga cikin alkawaran da na yi masa ba.

³⁵“Da sunana mai tsarki na yi alkawari sau ɗaya tak, Ba zan yi wa Dawuda ƙarya ba!

³⁶Zuriyarsa za ta kasance kullum, Zan lura da mulkinsa muddin rana tana haskakawa.

³⁷Zai dawwama kamar wata, Kamar amintaccen mashaidin nan da yake a sararin sama.”

³⁸Amma kana fushi da zaɓaɓɓen sarkinka, Ka rabu da shi, ka yashe shi.

³⁹Ka soke alkawarinka wanda ka yi wa bawanka, Ka jefar da kambinsa a cikin ƙazanta.

⁴⁰Ka rurrushe garun birninsa, Ka mai da sansaninsa mai kagara kufai.

⁴¹Dukan waɗanda suke wucewa za su sace masa kayansa, Maƙwabtansa duka suna yi masa ba'a.

⁴²Ka ba maƙiyansa nasara, Ka sa dukansu su yi murna.

⁴³Ka sa makamansa su zama marasa amfani, Ka bari a ci shi da yaƙi.

⁴⁴Ka ƙwace masa sandan sarautarsa, Ka buge gadon sarautarsa ƙasa.

⁴⁵Ka sa shi ya tsofe kafin lokacinsa, Ka rufe shi da kunya.

⁴⁶Har yaushe za ka ɓoye kanka, ya Ubangiji? Har abada ne? Har yaushe fushinka zai yi ta ci kamar wuta?

⁴⁷Ka tuna kwanakin mutum kaɗan ne, ya Ubangiji, Ka tuna yadda ka halicci mutane duka masu mutuwa ne!

⁴⁸Wa zai rayu har abada, ba zai mutu ba? Ƙaƙa mutum zai hana kansa shiga kabari?

⁴⁹Ya Ubangiji, ina ƙaunarka ta dā? Ina alkawaran nan waɗanda ka yi wa Dawuda?

⁵⁰Kada ka manta da yadda aka ci mutuncina, ni da nake bawanka, Da yadda na daure da dukan cin mutuncin da arna suka yi mini.

⁵¹Ya Ubangiji, kada ka manta da yadda maƙiyanka suka ci mutuncin zaɓaɓɓen sarki da ka naɗa! Suka yi ta cin mutuncinsa duk inda ya tafi.

⁵²Mu yabi Ubangiji har abada! Amin! Amin!