Read gungbe PSALM 97 Bible Online

PSALM 97 - gungbe bible

PSALM 97

¹Ubangiji Sarki ne! Ki yi murna ke duniya! Ku yi murna, dukanku tsibiran da suke cikin tekuna!

²Gajimare da duhu sun kewaye shi. A kan adalci da gaskiya ya kafa mulkinsa.

³Wuta tana tafe a gabansa, tana cinye maƙiyansa Waɗanda suke kewaye da shi.

⁴Walƙiyarsa ta haskaka duniya, Duniya kuwa ta gani ta yi ta rawar jiki.

⁵Tuddai sun narke a gaban Ubangiji kamar kākin zuma, A gaban Ubangijin dukan duniya.

⁶Sammai suna shelar adalcinsa, Dukan kabilai kuwa, sun ga ɗaukakarsa.

⁷Dukan waɗanda suke yi wa siffofi sujada za su sha kunya, Haka kuma waɗanda suke fāriya da gumakansu. Dukan alloli za su rusuna a gabansa.

⁸Jama'ar Sihiyona suna murna, Garuruwan Yahuza kuma suna farin ciki, Sabili da irin shari'unka, ya Ubangiji!

⁹Ya Ubangiji Mai Iko Dukka, kai kake mulkin dukan duniya, Ka fi sauran alloli duka girma.

¹⁰Ubangiji yana ƙaunar masu ƙin mugunta. Yakan kiyaye rayukan jama'arsa, Yakan cece su daga ikon mugaye.

¹¹Haske yakan haskaka adalai, Haka kuma murna ta cika ga masu nagarta.

¹²Dukanku adalai ku yi murna, Saboda abin da Ubangiji ya yi! Ku tuna da abin da Mai Tsarki ya yi, Ku yi masa godiya!