Read gungbe HÓWHÍNWHÉN LẸ 1 Bible Online

HÓWHÍNWHÉN LẸ 1 - gungbe bible

HÓWHÍNWHÉN LẸ 1

¹Karin maganar Sulemanu, ɗan Dawuda, Sarkin Isra'ila.

²Ga Karin magana da za su taimake ka ka rarrabe da hikima, da kyakkyawar shawara, da fahimtar ma'anar zurfafan karin magana,

³da yadda za ka karɓi koyarwa ta hanyar hikima, da adalci, da gaskiya, da sanin abin da yake daidai.

⁴Sukan sa marar sani ya zama masani, sukan koya wa samari yadda za su zama masu amfani.

⁵Waɗannan karin magana sukan ƙara wa masu ilimi hikima, sukan zama jagora ga masana,

⁶don su fahimci ɓoyayyiyar ma'anar da take cikin karin magana, da mawuyatan al'amura waɗanda masu hikima suka ƙago.

⁷In kana so ilimi dole ne ka fara da tsoron Ubangiji. Jahilai ba su san darajar hikima ba, sun kuwa ƙi su koya.

⁸Ɗana, ka kasa kunne ga koyarwar mahaifinka, ka mai da hankali ga abin da mahaifiyarka take faɗa.

⁹Koyarwarsu za ta inganta halinka, ta zama kayan ado kamar kyakkyawan rawani a kanka, ko kyakkyawan abin wuya a wuyanka, don su ƙara maka kyau.

¹⁰Ɗana sa'ad da masu zunubi suka jarabce ka, kada ka yarda

¹¹in suka ce maka, “Zo mu tafi mu nemi wani mutum mu kashe, mu je, mu fāɗa wa marasa laifi mu ji daɗi!

¹²Ba mu damu da ransu da lafiyarsu ba, mu dai mu tafi mu kashe su, mu hallaka su ɗungum.

¹³Za mu sami dukiya iri iri, mu cika gidajenmu da ganima!

¹⁴Ka zo ka haɗa kai da mu, dukanmu kuwa za mu raba abin da muka sato.”

¹⁵Ɗana, kada ka gama kanka da irin waɗannan mutane, ka yi nesa da su.

¹⁶Ba su kasalar aikata mugunta, kullum a shirye suke su yi kisankai.

¹⁷Ba shi da amfani a kafa tarko a idon tsuntsun da ake so a kama.

¹⁸Amma waɗannan irin mutane kansu suke kafa wa tarko. Ba za su kama kome ba, sai rayukansu.

¹⁹Yin fashi yakan zama sanadin mutuwar ɗan fashi a koyaushe. Wannan shi ne abin da yakan sami kowane mutum da ya kama sana'ar sata.

²⁰Ku kasa kunne! Hikima tana kira a tituna da a kasuwoyi.

²¹Tana kira da ƙarfi a ƙofofin birni, a duk inda mutane suke tattaruwa.

²²Ta ce, “Wawayen mutane! Har yaushe za ku yi ta kasancewa haka? Har yaushe za ku daina jin daɗin yi wa mai ilimi ba'a? Faufau ba za ku taɓa koya ba?

²³Ku kasa kunne lokacin da nake tsauta muku, zan ba ku shawara mai kyau, mu yi tarayya cikin ilimina.

²⁴Ina ta kiranku ina gayyatarku ku zo, amma ba ku kula ba, ba ku mai da hankali gare ni ba.

²⁵Kun ƙi bin shawarwarina duka, ba ku yarda in gyara kuskurenku ba.

²⁶Saboda haka, lokacin da kuke shan wahala, zan yi muku dariya. Zan yi muku ba'a lokacin da razana ta auka muku,

²⁷sa'ad da ta zo muku kamar hadiri mai ƙaƙƙarfar iska mai wahalarwa, sa'ad da kuke shan azaba da damuwa.

²⁸Sa'an nan za ku kira gare ni, amma ba za ku same ni ba. Za ku neme ni a ko'ina, amma ba za ku same ni ba.

²⁹Domin ba ku taɓa sanin amfanin ilimi ba, kun ƙi tsoron Ubangiji a kullum.

³⁰Ba ku taɓa yarda da shawarata ba, ko ku yarda in gyara kuskurenku.

³¹Saboda haka za ku karɓi sakayyarku, ayyukanku za su cuce ku.

³²Marasa sani sukan mutu saboda ba su yarda da hikima ba. Wawaye kuwa sukan hallaka saboda rashin kulawarsu.

³³Amma duk wanda ya kasa kunne gare ni, zai zauna lafiya. Ba abin da zai same shi, ba abin da zai tsorata shi.”