Read gungbe HÓWHÍNWHÉN LẸ 10 Bible Online

HÓWHÍNWHÉN LẸ 10 - gungbe bible

HÓWHÍNWHÉN LẸ 10

¹Karin maganar Sulemanu ke nan. Ɗa mai hikima abin fāriya ne ga mahaifinsa, amma wawa yakan jawo wa mahaifiyarsa baƙin ciki.

²Abin da ka samu ta hanyar zamba ba zai yi albarka ba, amma gaskiya za ta cece ka.

³Ubangiji ba zai bar mutumin kirki da yunwa ba, amma zai hana mugu ya kai ga biyan bukatarsa.

⁴Ragwanci zai sa talauci, amma yin aiki sosai zai arzuta ka.

⁵Mutum mai hankali yakan tattara amfanin gona da kaka, amma abin kunya ne a yi barci a lokacin girbi.

⁶Mutumin kirki yakan karɓi albarka, maganganun mugun kuwa sukan ɓoye mugun halinsa.

⁷Tunawa da mutumin kirki albarka ce, amma nan da nan za a manta da mugaye.

⁸Mutane masu hankali sukan bi shawarar kirki, masu maganar wauta kuwa za su lalace.

⁹Amintaccen mutum zai zauna lafiya ba abin da zai same shi, amma marasa aminci za a kama su.

¹⁰Mutumin da ya ƙi faɗar gaskiya yana haddasa wahala, amma wanda ya bayyana gaskiya zai kawo salama.

¹¹Kalmomin mutumin kirki maɓuɓɓugan rai ne, amma kalmar mugun takan ɓoye makircinsa.

¹²Ƙiyayya takan haddasa wahala, amma ƙauna takan ƙyale dukan laifofi.

¹³Mutane masu fasaha sukan yi magana mai ma'ana, amma wawaye suna bukatar horo.

¹⁴Mutane masu hikima sukan nemi ilimi iyakar iyawarsu, amma sa'ad da wawa ya yi magana, wahala tana kusa.

¹⁵Wadata takan kiyaye attajiri, amma tsiya takan hallaka matalauci.

¹⁶Sakayyar da za a yi wa mutumin kirki ta rai ce, amma zunubi yakan sa a ƙara yin wani zunubi.

¹⁷Mutumin da yake kasa kunne sa'ad da ake kwaɓarsa zai rayu, amma duk wanda bai yarda da kuskurensa ba yana cikin hatsari.

¹⁸Mutumin da yake faɗar ƙarairayi maƙiyi ne, dukan wanda yake baza jitajita wawa ne.

¹⁹Bisa ga yawan surutunka, mai yiwuwa ne ƙwarai ka yi zunubi, amma idan kai mai la'akari ne, sai ka yi shiru.

²⁰Kalmomin mutumin kirki suna kama da azurfa tsantsa, amma shawarwarin mugu ba su da wani amfani.

²¹Kalmomin mutumin kirki za su amfani mutane da yawa, amma kana iya hallaka kanka da wauta.

²²Albarkar Ubangiji takan arzuta mutum, amma yawan aiki ba shi yake kawo arziki ba.

²³Wawa ne yake jin daɗin aikata mugunta, amma mai fasaha yana jin daɗin hikima.

²⁴Abin da mugun yake tsoro, shi yakan auko masa, amma adali yakan sami biyan bukatarsa.

²⁵Hadiri yakan taso ya wargaza mugaye, amma amintattu lafiya lau suke a ko yaushe.

²⁶Sam, kada ka sa malalaci ya yi maka wani abu, zai sa ka ka yi fushi, idanunka su cika da hawaye mai zafi.

²⁷Ka yi tsoron Ubangiji za ka rayu, ka yi tsawon rai, amma mugaye sukan mutu tun kwanansu bai ƙare ba.

²⁸Abin da mutanen kirki suke sa zuciya yakan kai su ga murna, amma mugaye ba su da wani abu da za su sa zuciya a kai.

²⁹Ubangiji yana kiyaye marasa laifi, amma yakan hallaka masu mugunta.

³⁰Kullayaumi adalai sukan yi zamansu lafiya, amma mugaye ba za su zauna a ƙasar ba.

³¹Maganar adalai ta hikima ce, amma harshen da yake hurta mugunta, za a dakatar da shi.

³²Adalai sun san irin maganar da ta cancanta su faɗa, amma mugaye, kullum sukan faɗi maganar da za ta cutar.