Read gungbe HÓWHÍNWHÉN LẸ 12 Bible Online

HÓWHÍNWHÉN LẸ 12 - gungbe bible

HÓWHÍNWHÉN LẸ 12

¹Mutumin da yake ƙaunar ilimi yakan so a faɗa masa kuskurensa, wauta ce mutum ya ƙi yarda a faɗa masa laifinsa.

²Ubangiji yana murna da mutanen kirki, amma yakan hukunta masu shirya mugunta.

³Mugunta ba ta kawo zaman lafiya, amma adalai sukan tsaya daram.

⁴Matar kirki abar fāriya ce, abar murna ga mijinta, amma idan ta sa shi kunya, ta zama masa kamar ciwo a ƙashinsa.

⁵Amintattun mutane za su yi maka abin da yake daidai, amma mugaye za su ruɗe ka.

⁶Maganganun mugaye na kisankai ne, amma kalmomin adalai sukan ceci waɗanda ake neman ransu.

⁷Mugaye sukan gamu da faɗuwarsu, ba magāda, amma iyalan adalai sukan dawwama.

⁸Idan kai haziƙi ne, za a yabe ka, amma idan kai dakiki ne, mutane za su raina ka.

⁹Gara kana talakanka, kana neman abinci, da ka mai da kanka kai wani abu ne, alhali kuwa abin da za ka ci ya fi ƙarfinka.

¹⁰Mutumin kirki yakan lura da dabbobinsa, amma mugaye sukan yi wa nasu ƙeta.

¹¹Manomin da yake aiki ƙwarai yana da isasshen abinci. Wauta ce a ɓatar da lokaci a kan aikin banza.

¹²Iyakar abin da mugaye suke so, shi ne su sami muguntar da za su yi, amma adalai suna tsaye daram.

¹³Maganganun mugun sukan zamar masa tarko, amma amintacce yakan fid da kansa daga cikin wahala.

¹⁴Sakayyar mutum ta rataya ne a kan maganarsa da aikinsa, zai sami abin da ya cancance shi.

¹⁵Wawa a kullum tsammani yake abin da yake yi daidai ne, amma masu hikima sukan kasa kunne ga shawara.

¹⁶Sa'ad da wawa ya hasala, nan da nan kowa zai sani, amma mai la'akari ba zai nuna ya kula ba.

¹⁷Sa'ad da ka faɗi gaskiya, ka yi adalci, amma ƙarairayi su ne jagorar aikata rashin adalci.

¹⁸Maganganun rashin tunani suke sa rauni mai zurfi kamar saran takobi, amma kalmomin mai hikima sukan warkar da raunuka.

¹⁹Gaskiya dawwamammiya ce, amma ƙarya ƙurarriya ce.

²⁰Waɗanda suke shawarta mugunta za a auka musu farat ɗaya, amma waɗanda suke aikata alheri za su yi farin ciki.

²¹Ba wani mugun abu da zai sami adali, amma mugaye ba za su sami kome ba, sai wahala.

²²Ubangiji yana ƙin maƙaryata, amma yana murna da masu faɗa da cikawa.

²³Mai la'akari zai bar wa cikinsa abin da ya sani, amma wawaye sukan yi ta tallar wautarsu.

²⁴Mutum mai mai da hankali ga aikinsa zai sami iko, amma ragwanci zai sa mutum ya zama bawa.

²⁵Damuwa takan hana wa mutum farin ciki, amma kalmomin alheri za su sa shi ya yi murna.

²⁶A ko yaushe adalin mutum yakan gwada halinsa, amma mugaye sukan ɓata a hanya.

²⁷Rago ba zai kai ga biyan bukatarsa ba, amma mai ƙwazo zai sami dukiya.

²⁸Adalci hanyar rai ne, amma wauta hanyar mutuwa ce.