Read gungbe HÓWHÍNWHÉN LẸ 14 Bible Online

HÓWHÍNWHÉN LẸ 14 - gungbe bible

HÓWHÍNWHÉN LẸ 14

¹Hikimar mata takan gina gidaje, amma wauta takan rushe su.

²Ka yi gaskiya, za ka nuna girmamawarka ga Ubangiji, amma idan ka yi rashin gaskiya, ka nuna rashin girmamawa ke nan ga Ubangiji.

³Kalmomin mai hikima za su kiyaye shi, amma maganganun wawa za su jawo masa hukunci.

⁴Idan ba ka da shanun noma ba za ka sami hatsi mai yawa ba, amma idan kana da su za ka sami hatsi mai yawan gaske.

⁵Amintaccen mashaidi a ko yaushe yana faɗar gaskiya, amma marar aminci ba ya faɗar kome, sai ƙarairayi.

⁶Mutum mai fāriya ba zai taɓa zama mai hikima ba sam, amma mutum mai basira yakan koya a sawwaƙe.

⁷Ka nisanci wawaye, gama ba su da abin da za su koya maka.

⁸Me ya sa haziƙi yake da hikima? Domin ya san abin da zai yi. Me ya sa dakiki yake wauta? Domin yana ganin kansa masani ne.

⁹Idan wawaye sun yi zunubi ba sukan kula ba, amma mutanen kirki sukan nemi gafara.

¹⁰Ɓacin ranka naka ne, murnarka kuwa ba za ka raba da wani ba.

¹¹Gidan mutumin kirki ba zai rushe ba bayan da an lalatar da gidan mugun mutum.

¹²Hanyar da kake tsammani ita ce daidai, za ta kai ka ga hallaka.

¹³Dariyar mutum takan ɓoye baƙin cikinsa. Sa'ad da murna ta tafi, ko yaushe baƙin ciki yana nan.

¹⁴Mugu zai sami abin da ya cancance shi, mutumin kirki kuma zai sami sakayyar ayyukansa.

¹⁵Wawa yakan gaskata kowane abu, amma mai la'akari yana lura da takawarsa.

¹⁶Mutum mai hankali yana lura don ya kauce wa wahala, amma wawa rashin kula gare shi, yakan aikata kome da gaggawa.

¹⁷Mutum mai zafin rai yakan yi aikin wauta, mai mugayen dabaru kuma abin ƙi ne.

¹⁸Jahilai sukan sami abin da ya cancanci wautarsu, amma ilimi shi ne sakamakon masu azanci.

¹⁹Tilas mugaye su rusuna wa adalai, su roƙe su tagomashi da tawali'u.

²⁰Ba wanda yake son matalauci, amma attajiri yana da abokai da yawa.

²¹Idan kana so ka zama mai farin ciki, sai ka nuna alheri ga matalauci. Zunubi ne ka raina kowane mutum.

²²Waɗansu za su amince da kai, su girmama ka, idan ka aikata nagarta, idan kuwa ka aikata mugunta, to, ka yi babban kuskure.

²³Idan ka yi aiki za ka sami abin masarufi, idan kuwa ka zauna kana ta surutu kawai za ka zama matalauci.

²⁴Mutane masu hikima za a sāka musu da wadata, amma za a san wawa ta wurin wautarsa.

²⁵Sa'ad da mashaidi ya faɗi gaskiya zai ceci rayuka, amma maƙaryacin mashaidi yakan ci amanar mutane sa'ad da ya faɗi ƙarairayi.

²⁶Tsoron Ubangiji yakan ba da tabbatarwa, da zaman lafiya ga mutum da iyalinsa.

²⁷Kana so ka kauce wa mutuwa? To, tsoron Ubangiji shi ne maɓuɓɓugar rai.

²⁸Darajar sarki ta dogara ga irin yawan mutane da ya mallaka, idan ba su, shi ba kome ba ne.

²⁹Mutum mai kamewa yana da hikima, amma mai zafin rai yana bayyana wautarsa a fili.

³⁰Kwanciyar rai lafiya ce ga jiki, amma kishi yana kama da ciwon da yake cin ƙashi.

³¹Wanda ya zalunci matalauci ya zargi Mahaliccinsa ke nan, amma nuna alheri ga matalauci yin sujada ne.

³²Muguntar mugun takan kawo hallakarsa, amma adalin mutum, an kiyaye shi ta wurin dattakonsa.

³³Hikima tana cikin kowane tunani na haziƙi, wawa bai san kome game da hikima ba.

³⁴Adalci yakan ɗaukaka al'umma, amma zunubi yakan kunyatar da al'umma.

³⁵Sarakuna suna jin daɗin ƙwararrun 'yan majalisarsu, amma sukan hukunta waɗanda suka ba su kunya.