Read gungbe HÓWHÍNWHÉN LẸ 19 Bible Online

HÓWHÍNWHÉN LẸ 19 - gungbe bible

HÓWHÍNWHÉN LẸ 19

¹Gara mutum ya zama matalauci amma mai aminci, da a ce ya zama maƙaryaci, wawa.

²Yin ɗokin da ba ilimi ba shi da amfani, rashin haƙuri kuma zai jawo maka wahala.

³Waɗansu mutane sukan lalatar da kansu ta wurin ayyukansu na jahilci, sa'an nan su sa wa Ubangiji laifi.

⁴Attajirai sukan sami sababbin abokai a ko yaushe, amma matalauta ba zu su iya riƙon 'yan kaɗan da suke da su ba.

⁵Idan ka faɗi ƙarya a majalisa, za a hukunta ka, ba za ka kuɓuta ba.

⁶Kowa na ƙoƙari ya sami farin jini wurin manyan mutane, kowa na so a ce shi abokin mutumin nan ne, mai yawan alheri.

⁷'Yan'uwan matalauci ba su bukatarsa, ba abin mamaki ba ne ya rasa abokai. Kome ƙoƙarin da zai yi ba zai sami ko ɗaya ba.

⁸Ka yi wa kanka gatanci, ka koyi dukan abin da kake iyawa, sa'an nan ka tuna da abin da ka koya, za ka arzuta.

⁹Ba wanda zai faɗi ƙarya a majalisa ya rasa shan hukunci, maƙaryaci, tasa ta ƙare.

¹⁰Ko kusa wawaye ba za su yi zaman jin daɗi ba, haka nan kuma bayi ba za su yi mulki a kan iyayengijinsu ba.

¹¹Mutum mai hankali yake danne fushinsa. Lokacin da wani ya cuce ka, abin kirki ne, ka yi kamar ba ka kula da shi ba.

¹²Hasalar sarki kamar rurin zaki ne, amma alherinsa kamar saukar ruwan sama ne.

¹³Dakikin ɗa yana jawo wa mahaifinsa lalacewa, mace mai mita tana kama da ɗiɗɗigar ruwa.

¹⁴Mutum na iya cin gādon gida da kuɗi daga wurin iyayensa, amma Ubangiji ne kaɗai yake ba shi mace mai hankali.

¹⁵Rago, yi ta ragwancinka ka yi ta sharar barci, amma kai za ka sha yunwa.

¹⁶Ka kiyaye umarnai za ka rayu, in ka ƙi binsu kuwa za ka mutu.

¹⁷Sa'ad da ka bayar ga matalauci kamar ka ba Ubangiji rance ne, gama Ubangiji zai sāka maka.

¹⁸Ka yi wa 'ya'yanka tarbiyya tun suna ƙanana yadda za su iya koyo. Idan ba ka yi haka ba, ka taimaka wajen lalacewarsu ke nan.

¹⁹Idan mutum mai zafin rai ne, ƙyale shi ya sha sakamakonsa. Idan ka fisshe shi daga cikin wahala sau ɗaya, sai ka sāke yi.

²⁰Ka saurari shawara, ka yarda ka koya, wata rana za ka zama mai hikima.

²¹Mutum ya iya shirya dabaru iri iri, amma sai nufin Ubangiji ne zai tabbata.

²²Abin kunya ne mutum ya zama mai haɗama, matalauci kuma ya fi maƙaryaci.

²³Ka yi tsoron Ubangiji za ka yi tsawon rai, ka kuma sami biyan bukata, ba abin da zai cuce ka.

²⁴Waɗansu mutane sun cika lalaci, ko abincinsu ba su iya taunawa.

²⁵Za a hukunta mai fāriya saboda ya zama ishara ga mutanen da ba su san kome ba, mutum mai hikima yakan koya sa'ad da aka tsauta masa.

²⁶Sai marar kunya, marar mutunci suke wulakanta mahaifinsa, ko ya kori mahaifiyarsa daga gidansa.

²⁷Ɗana idan ka bar yin nazari za ka manta da abin da ka riga ka koya.

²⁸Ba gaskiya ga mashaidin da ya yi niyyar cutar wani. Mugaye suna ƙaunar yin mugunta.

²⁹Wawa mai fāriya hakika zai sha dūka.