Read gungbe HÓWHÍNWHÉN LẸ 2 Bible Online

HÓWHÍNWHÉN LẸ 2 - gungbe bible

HÓWHÍNWHÉN LẸ 2

¹Ɗana, ka koyi abin da nake koya maka, sam kada ka manta da abin da na faɗa maka ka yi.

²Ka kasa kunne ga abin da yake na hikima, ka yi ƙoƙari ka fahimce shi.

³I, ka roƙi ilimi da tsinkaya.

⁴Ka nema da iyakar ƙoƙarinka kamar yadda za ka nemi azurfa, ko kowace irin ɓoyayyiyar dukiya.

⁵Idan ka yi za ka san abin da ake nufi da tsoron Ubangiji. Za ka yi nasara a kan koyon sanin Allah.

⁶Ubangiji ne yake ba da hikima. Ilimi da fahimi kuwa suna cikin kalmominsa.

⁷Shi yake tanada wa adalai taimako da kiyayewa, wato mutane masu aminci.

⁸Yakan kiyaye waɗanda suke lura da kyau, ya kiyaye waɗanda suke dogara gare shi.

⁹Idan ka kasa kunne gare ni za ka san abin da yake daidai, da abin da yake gaskiya, da abin da yake na kirki. Za ka san abin da za ka yi.

¹⁰Za ka zama mai hikima, iliminka zai faranta maka rai.

¹¹Tsinkayarka da fahiminka za su tsare ka.

¹²Za su hana ka aikata mugayen ayyuka, za su nisantar da kai daga mutane masu ta da hargitsi da irin maganganunsu,

¹³mutane waɗanda suka bar zaman adalci don su zauna cikin duhun zunubi,

¹⁴waɗanda suke jin daɗin yin laifi, suna nishaɗi cikin mugunta.

¹⁵Ba za a dogara da su ba, ba kuwa za a iya amincewa da su ba.

¹⁶Za a nisantar da kai daga mazinaciya, wadda take ƙoƙari ta lalatar da kai da daɗin bakinta,

¹⁷marar aminci ga mijinta, wadda ta manta da tsarkakan alkawaran da ta ɗauka.

¹⁸Idan ka tafi gidanta ka kama hanyar mutuwa. Tafiya can kama hanyar zuwa lahira ne.

¹⁹Duk wanda ya ziyarce ta ba ya ƙara komowa. Ba zai ƙara komowa ga hanyar rai ba.

²⁰Saboda haka dole ka bi hanyar da mutanen kirki suka bi, ka bi gurbin adalai.

²¹Mutane adalai, masu kamewa, su ne za su zauna ƙasarmu.

²²Amma Allah zai fizge mugaye daga ƙasar, ya kuma tumɓuke masu zunubi kamar yadda ake tumɓuke shuke-shuke daga ƙasa.