Read gungbe HÓWHÍNWHÉN LẸ 23 Bible Online

HÓWHÍNWHÉN LẸ 23 - gungbe bible

HÓWHÍNWHÉN LẸ 23

¹Sa'ad da ka zauna cin abinci tare da babban mutum, ka tuna da yadda yake.

²Idan kai mai son ci da yawa ne sai ka kanne.

³Kada ka yi haɗamar kyakkyawan abincin da yake gabanku, zai yiwu wayo yake so ya yi maka.

⁴Ka zama mai isasshiyar hikima, kada ka gajiyar da kanka garin ƙoƙarin neman dukiya.

⁵Kuɗinka sun iya ƙarewa kamar ƙyiftawar ido, kamar suna da fikafikai su tashi kamar gaggafa.

⁶Kada ka ci abincin marowaci, ko ka yi haɗamar kyakkyawan abincin da ya sa a gabanka.

⁷Zai ce, “Bari a ƙara maka,” amma ba haka yake nufi ba. Kamar gashi yake a cikin maƙogwaronka.

⁸Za ka harar da abin da ka ci, dukan daɗin bakinka zai tafi a banza.

⁹Kada ka yi wa wawa magana irin ta haziƙai, gama ba zai yaba da maganarka ba.

¹⁰Kada ka kuskura ka kawar da shaidar iyaka, ko ka ƙwace gonar marayu.

¹¹Ubangiji Mai Iko shi ne kāriyarsu, shi zai yi magana dominsu.

¹²Ka mai da hankali ga malaminka, ka koyi dukan abin da kake iyawa.

¹³Kada ka bar yaro ba horo, gama ko ka duke shi ba za a kashe shi ba.

¹⁴Lalle ne za ka ceci ransa.

¹⁵Ɗana, idan ka zama mai hikima zan yi murna ƙwarai.

¹⁶Zan yi murna idan na ji kana faɗar magana da hikima.

¹⁷Kada ka yi ƙyashin masu aikata zunubi tsoron Ubangiji kaɗai za ka sa a gaba.

¹⁸Idan haka ta samu za ka yi farin ciki nan gaba.

¹⁹Ka saurara, ya ɗana, ka zama mai hikima. Ka yi tunani mai zurfi a kan hanyarka.

²⁰Kada ka zauna da mashayan ruwan inabi, ko masu haɗama.

²¹Gama bugaggu da ruwan inabi da masu zarin ci za su zama matalauta. Idan iyakar abin da kake yi daga ci sai barci ne, nan da nan za ka ga kana saye da tsummoki.

²²Ka kasa kunne ga mahaifinka, gama da ba dominsa ba, da ba ka, sa'ad da mahaifiyarka ta tsufa ka nuna mata godiyarka.

²³Gaskiya, da hikima, da ilimi, da hankali, sun cancanta a saye su, kome tamaninsu.

²⁴Mahaifin adali yana da dalilin yin murna. Zai yi fāriya a kan ɗa mai hikima.

²⁵Ka sa mahaifinka da mahaifiyarka su yi fāriya da kai, ka sa mahaifiyarka farin ciki.

²⁶Ɗana ka mai da hankali sosai, irin zamana ya zamar maka kyakkyawan misali.

²⁷Karuwa, da mata mazinata, tarkon mutuwa ne su.

²⁸Sukan laɓe su jira ka kamar mafasa, suna sa mutane da yawa su zama marasa aminci.

²⁹Wa ake yi wa kaito? Wa yake da baƙin ciki? Wane ne mafaɗaci? Wa yake yin gunaguni? Wa yake da raunuka ba dalili? Wa yake da jan ido?

³⁰Sai riƙaƙƙen mashayi wanda yake gaurayar ruwan inabi.

³¹Kada ka bar ruwan inabi ya jarabce ka, ko da yake ja wur yake, har kana iya ganin kanka a cikin ƙoƙon, yana kuwa da kyan gani sa'ad da kake motsa shi.

³²Kashegari za ka ji kamar maciji mai dafi ne ya sare ka.

³³Idanunka za su riƙa gane-gane, ba za ka iya tunani ko ka faɗi magana sosai ba.

³⁴Za ka ji kamar kana can cikin teku, jirin teku na ɗibarka kana lilo a kan rufin jirgin ruwa da yake tangaɗi.

³⁵Za ka ce, “Lalle an doke ni, sosai an daddoke ni amma ban san lokacin ba, me ya sa ban farka ba? Ina bukatar in ƙara sha.”