Read gungbe HÓWHÍNWHÉN LẸ 24 Bible Online

HÓWHÍNWHÉN LẸ 24 - gungbe bible

HÓWHÍNWHÉN LẸ 24

¹Kada ka ji ƙyashin mugaye, kada ka yi ƙoƙarin yin abuta da su.

²Duk tunaninsu na yin mugunta ne, a duk lokacin da suka buɗe bakinsu sai sun cuci wani.

³An gina gidaje a kan harsashin hikima da fahimi.

⁴Ta wurin ilimi a kan ƙawata ɗakuna da kyawawan kayayyaki masu tamani.

⁵Mai hikima ƙaƙƙarfa ne, i, mai ilimi yana daɗa ƙarfi.

⁶Banda wannan ma, dole ne ka shisshirya a natse kafin ka kama yaƙi. Bisa ga shawarwarin da za ka samu ne za ka yi nasara.

⁷Kalmomi masu hikima sun yi wa wawa zurfin ganewa ƙwarai, ba shi da ta cewa sa'ad da ake magana a kan muhimman abubuwa.

⁸Idan a ko yaushe shirye-shiryen mugunta kake, za ka yi suna a kan kuta tashin hankali.

⁹Kowace irin dabarar da wawa yake tunani a kanta zunubi ne. Jama'a suna ƙin mutum mai rainako.

¹⁰Idan ba ka da ƙarfi a lokacin hargitsi, hakika ka tabbata marar ƙarfi.

¹¹Kada ka ji nauyin ceton wanda ake janye da shi zuwa inda za a kashe shi.

¹²Mai yiwuwa ne ka ce kai ba ruwanka, amma Allah ya sani, yana kuwa auna manufofinka. Yana lura da kai, ya kuwa sani. Yakan sāka wa mutane a kan abin da suke aikatawa.

¹³Ɗana, ka sha zuma gama tana da kyau. Kamar yadda kakin zuma yake da zaƙi a harshenka,

¹⁴haka ilimi da hikima suke da amfani ga ranka. Ka same su, a gaba za ka yi farin ciki.

¹⁵Kada ka shirya dabarun yi wa amintacce ƙwace, ko ka ƙwace masa gidansa, wannan mugunta ce.

¹⁶Ko sau nawa amintaccen mutum ya faɗi, ba abin damuwa ba ne, gama a ko yaushe zai sāke tashi, amma masifa takan hallaka mugaye.

¹⁷Kada ka yi murna sa'ad da bala'i ya aukar wa maƙiyinka.

¹⁸Ubangiji zai sani in kana murna, ba kuwa zai so haka ba, mai yiwuwa ne ba zai hukunta shi ba.

¹⁹Kada ka damu saboda mugaye, kada ka yi ƙyashin masu aikata abin da ba daidai ba.

²⁰Gama mugun mutum ba shi da sa zuciya, ba abin da zai sa zuciya a kansa nan gaba.

²¹Ɗana, ka yi tsoron Ubangiji, ka kuma ji tsoron sarki, kada ka yi harkar kome da mutanen da suka tayar musu.

²²Irin waɗannan mutane sukan hallaka farat ɗaya. Ka taɓa yin tunani a kan bala'in da Allah ko sarki sukan aukar?

²³Masu hikima kuma sun faɗi waɗannan abu. Kuskure ne alƙali ya yi son zuciya.

²⁴Idan ya kuɓutar da mugu, kowane mutum da yake a duniya zai la'anta shi ya ƙi shi.

²⁵Alƙalan da suke hukunta wa mai laifi kuwa, za su arzuta, su ji daɗin kyakkyawan suna.

²⁶Amsar gaskiya ita ce alamar abuta ta ainihi.

²⁷Kada ka gina gidanka ka kafa shi, sai ka gyara gonakinka, ka tabbata za ka sami abin zaman gari.

²⁸Kada ka ba da shaida a kan maƙwabcinka ba tare da isasshen dalili ba, ko ka faɗi ƙarya a kansa.

²⁹Kada ka ce, “Zan yi masa daidai da yadda ya yi mini, zan rama masa!”

³⁰Na ratsa ta gonakin inabin wani malalaci, dakiki,

³¹suna cike da ƙayayuwa, ciyayi sun sha kansu, katangar dutse da take kewaye da su ta faɗi.

³²Da na dubi wannan, na yi tunani a kansa, ya zamar mini ishara.

³³“Yi ta ruruminka, ci gaba da barcinka, rungume hannuwanka don ka shaƙata.”

³⁴Amma sa'ad da kake ta sharar barci fatara za ta auka maka kamar ƙungiyar 'yan fashi.