Read gungbe HÓWHÍNWHÉN LẸ 27 Bible Online

HÓWHÍNWHÉN LẸ 27 - gungbe bible

HÓWHÍNWHÉN LẸ 27

¹Kada ka yi fāriya a kan abin da za ka yi gobe domin ba ka san abin da zai faru daga yanzu zuwa gobe ba.

²Bari waɗansu su yabe ka ko da baƙi ne, faufau kada ka yabi kanka.

³Dutse da yashi suna da nauyi ƙwarai, amma nauyin wahalar da wawa zai haddasa ya fi nasu duka.

⁴Fushi mugun abu ne mai hallakarwa, amma duk da haka bai kai ga kishi ba.

⁵Gara ka tsauta wa mutum a fili da ka bar shi ya zaci ba ka kula da shi ba sam.

⁶Aboki aboki ne ko da ya cuce ka, amma maƙiyi ko ya rungume ka kada ka sake!

⁷Wanda ya ƙoshi ba zai ko kula da zuma ba, amma wanda yake jin yunwa abinci mai ɗaci zaƙinsa yake ji.

⁸Mutumin da ya bar gida yana kama da tsuntsun da ya bar sheƙarsa.

⁹Turare da man ƙanshi sukan sa ka ji daɗi, haka abuta ta ainihi takan ƙara maka ƙarfi.

¹⁰Kada ka manta da abokanka, ko abokan mahaifinka. Idan kana shan wahala kada ka nemi taimako wurin ɗan'uwanka. Maƙwabci na kusa yana iya taimakonka fiye da ɗan'uwan da yake nesa.

¹¹Ɗana, ka zama mai hikima, ni kuwa zan yi farin ciki, zan iya amsa kowace irin sūkar da wani zai yi mini.

¹²Mutum mai hankali yakan hango hatsari ya kauce masa, amma mutumin da ba shi da kula, yakan kutsa kai ciki, daga baya ya yi da na sani.

¹³Ka karɓe tufar wanda ya zamar wa baƙo lamuni, da kuma wanda ya zama lamunin karuwa.

¹⁴In ka farkar da abokinka da babbar murya tun da sassafe, daidai ne da zaginsa.

¹⁵Mace mai mita kamar ɗiɗɗigar ruwa take ba ƙaƙƙautawa.

¹⁶Kaƙa za ka iya sa ta ta kame bakinta? Ka taɓa ƙoƙarin tsai da iska? Ko kuwa ka taɓa ƙoƙarin dintsi mai a tafin hannunka?

¹⁷Daga wurin mutane mutane suke koyo, kamar yadda a kan wasa ƙarfe da ƙarfe.

¹⁸Ka lura da itacen ɓaure, zai yi 'ya'ya ka ci. Baran da ya lura da maigidansa za a girmama shi.

¹⁹Yadda kake ganin fuskarka a ruwa, haka kake ganin kanka a zuciyarka.

²⁰Muradin mutum kamar lahira yake, a kullum ba ya ƙoshi.

²¹Da wuta ake gwada azurfa da zinariya, amma yabon da ake yi wa mutum shi ne magwajinsa.

²²Ko da za ka doki wawa ka bar shi tsakanin rai da mutuwa, duk da haka yana nan da wautarsa kamar yadda yake.

²³Ka lura da garkunan tumakinka da na shanunka da kyau iyakar iyawarka,

²⁴domin dukiya ba ta tabbata har abada, al'ummai ma haka ne.

²⁵Ka yanki ingirici, lokacin da yake toho kana iya yankar ciyawa a gefen tuddai.

²⁶Kana iya yin tufafi da ulun tumakinka, kana iya sayen gona da kuɗin awakinka.

²⁷Madarar awakinka za ta zama abincinka kai da iyalinka, da kuma barorinka 'yan mata.