Read gungbe HÓWHÍNWHÉN LẸ 3 Bible Online

HÓWHÍNWHÉN LẸ 3 - gungbe bible

HÓWHÍNWHÉN LẸ 3

¹Ɗana kada ka manta da abin da na koya maka. Kullum ka tuna da abin da na faɗa maka ka yi.

²Koyarwata za ta ba ka tsawon rai da wadata.

³Kada ka yarda ka rabu da biyayya da aminci, ka ɗaura su a wuyanka, ka rubuta su kuma a zuciyarka.

⁴Idan ka yi wannan kuwa, Allah zai yi murna da kai. Za ka yi nasara cikin hulɗar da kake yi da mutane.

⁵Ka dogara ga Ubangiji da zuciya ɗaya, kada ka dogara ga abin da kake tsammani ka sani.

⁶A cikin dukan abin da kake yi, ka tuna da Ubangiji, shi kuma zai nuna maka hanyar da take daidai.

⁷Sam, kada ka yarda ka ɗauki kanka kai mai hikima ne fiye da yadda kake, kai dai ka ji tsoron Ubangiji, ka rabu da aikata mugunta.

⁸Idan ka kiyaye wannan, zai zama maka kamar magani mai kyau, ya warkar da raunukanka, ya kuma sawwaƙe maka azabar da kake sha.

⁹Ka girmama Ubangiji ta wurin miƙa masa hadaya daga mafi kyau na amfanin gonarka.

¹⁰Idan ka yi haka rumbunanka za su cika da hatsi. Za ka sami ruwan inabi mai yawa, har ka rasa wurin da za ka zuba shi duka.

¹¹Ɗana, sa'ad da Ubangiji ya tsauta maka ka mai da hankali sosai, ka kuma yarda da gargaɗinsa.

¹²Ubangiji yana tsauta wa waɗanda yake ƙauna. Kamar yadda mahaifi yakan tsauta wa ɗan da yake fāriya da shi.

¹³Mai farin ciki ne mutumin da ya zama mai hikima, ya kuma sami fahimi.

¹⁴Yana da riba mai yawan gaske fiye da ta azurfa, tamaninta a gare ka ya fi na zinariya.

¹⁵Tamanin hikima ya fi na lu'ulu'ai, ya kuma fi kowane irin abin da kake so tamani.

¹⁶Hikima takan tsawanta ranka, ta kuma ba ka dukiya da daraja.

¹⁷Hikima takan sa ka ji daɗin zama, ta kuma bi da kai lafiya a zamanka.

¹⁸Masu farin ciki ne waɗanda suka sami hikima, hikima za ta ba su rai kamar yadda itace yakan ba da 'ya'ya.

¹⁹Ubangiji ya halicci duniya ta wurin hikimarsa, Ya shimfiɗa sararin sama a inda yake ta wurin saninsa.

²⁰Hikimarsa ta sa ruwan koguna ya yi gudu, Gizagizai kuwa su zubo da ruwa bisa duniya.

²¹Ɗana ka riƙe hikimarka da basirarka. Ko kusa kada ka bari su rabu da kai.

²²Za su tanada maka rai, rai mai daɗi da farin ciki.

²³Za ka bi hanyarka lafiya lau, ba ko tuntuɓe.

²⁴Ba za ka ji tsoro, sa'ad da kake kwance a gadonka ba, za ka yi ta sharar barci a dukan dare.

²⁵Ba za ka damu da masifar da za ta auko farat ɗaya ba, irin wadda takan auka wa mugaye kamar hadiri.

²⁶Ubangiji zai kiyaye ka. Ba zai bari ka fāɗa cikin tarko ba.

²⁷Ka yi wa masu bukata alheri a duk lokacin da kake iyawa.

²⁸Sam, kada ka ce wa maƙwabcinka ya dakata sai gobe, idan dai kana iya taimakonsa yanzu.

²⁹Kada ka shirya kome da zai cuci maƙwabcinka, gama yana zaune kusa da kai, yana kuwa amincewa da kai.

³⁰Kada ka yi jayayya ba dalili da wanda bai taɓa cutarka ba.

³¹Kada ka ji kishin masu ta da zaune tsaye, ko ka yi sha'awar aikata ayyukansu,

³²gama Ubangiji yana ƙin mutanen da suke aikata mugunta, amma yakan rungumi adalai ya amince da su.

³³Ubangiji yakan la'antar da gidajen masu mugunta, amma yakan sa wa gidajen adalai albarka.

³⁴Ba ruwansa da masu girmankai, amma masu tawali'u sukan sami tagomashi a wurinsa.

³⁵Mutane masu hikima za su sami kyakkyawan suna, amma wawaye sukan ƙara wa kansu shan kunya.