Read gungbe HÓWHÍNWHÉN LẸ 8 Bible Online

HÓWHÍNWHÉN LẸ 8 - gungbe bible

HÓWHÍNWHÉN LẸ 8

¹Ku kasa kunne! Hikima tana kira. Tana so a ji ta.

²Tana tsaye bisa kan tuddai a bakin hanya Da a mararraban hanyoyi.

³A ƙofofin shiga birni, tana kira,

⁴“Ina roƙonku, ya ku, 'yan adam, Ina kiran kowane mutum da yake a duniya.

⁵Ba ku balaga ba? To, ku balaga. Ku wawaye ne? Ku koyi hankali.

⁶Ku kasa kunne ga jawabina mafi kyau, Dukan abin da na faɗa muku daidai ne.

⁷Abin da na faɗa gaskiya ne, Ƙarairayi abin ƙi ne a gare ni.

⁸Kowane abu da na faɗa gaskiya ne, Ba wani abu da yake na laifi ko na ruɗawa.

⁹Ga mutum mai basira, dukan abu ne a sarari, Ga wanda aka sanar da shi sosai, abu ne a sawwaƙe.

¹⁰Ka zaɓi koyarwata fiye da azurfa, Ka zaɓi ilimi fiye da zinariya tsantsa.

¹¹“Ni ce hikima, na fi lu'ulu'ai, Cikin dukan abin da kake so, ba kamata.

¹²Ni ce hikima, ina da basira, Ina da ilimi da faɗar daidai.

¹³Ƙin mugunta shi ne tsoron Ubangiji, Na ƙi girmankai, da fāriya, da mugayen hanyoyi, Da maganganu na ƙarya.

¹⁴Nakan shirya abin da zan yi, in kuwa yi shi. Ina da fahimi, ina da ƙarfi.

¹⁵Nakan taimaki sarakuna su yi mulki, Mahukunta kuma su tsara dokoki masu kyau.

¹⁶Kowane mai mulki a duniya, da taimakona yake mulki, Ƙusoshin hukumomi da dattawan gari duka ɗaya.

¹⁷Ina ƙaunar waɗanda suke ƙaunata, Dukan wanda yake nemana kuma zai same ni.

¹⁸Ina da dukiya da daraja da zan bayar, Da wadata da nasara kuma.

¹⁹Abin da za ka samu daga gare ni Ya fi zinariya kyau, da azurfa tsantsa.

²⁰A kan hanyar adalci nake tafiya, Rankai a kan hanyoyin gaskiya.

²¹Ina ba da dukiya ga waɗanda suke ƙaunata, Ina kuma cika gidajensu da wadata.

²²“Ni ce halittar farko da Ubangiji Ya fara halittawa daga cikin ayyukansa tuntuni.

²³Da farkon farawa ni aka fara halittawa Kafin a yi duniya.

²⁴Ni aka fara yi kafin tekuna, A sa'ad da ba maɓuɓɓugan ruwa.

²⁵Ni aka fara yi kafin a yi duwatsu, Kafin a kafa tuddai a wurarensu,

²⁶Kafin Allah ya halicci duniya da filayenta, Ko ɗan ɓarɓashin ƙasa.

²⁷A can nake sa'ad da ya shata sararin sama, Da sa'ad da ya shimfiɗa al'arshi a hayin tekuna,

²⁸Da sa'ad da ya sa gizagizai a sararin sama, Ya buɗe maɓuɓɓugan teku,

²⁹Ya kuma umarci ruwan teku, kada ya zarce wurin da ya sa. Ina can sa'ad da ya kafa harsashin ginin duniya.

³⁰Ina kusa da shi kamar mai tsara fasalin gini, Ni ce abar murnarsa kowace rana, A ko yaushe ina farin ciki a gabansa.

³¹Ina farin ciki da duniya, Ina murna da 'yan adam.

³²“Yanzu ku matasa, ku kasa kunne gare ni, Ku yi abin da na ce, za ku yi farin ciki.

³³Ku saurari abin da aka koya muku, Ku zama masu hikima, kada ku yi sakaci da ita.

³⁴Mutumin da ya kasa kunne gare ni, zai yi farin ciki haka nan, Wato yakan tsaya a ƙofata ko yaushe, Yana kuma jira a ƙofar shiga gidana.

³⁵Mutumin da ya same ni ya sami rai, Ubangiji zai ji daɗinsa.

³⁶Mutumin da bai same ni ba ya cuci kansa, Duk wanda yake ƙina mutuwa yake ƙauna.”