Read gungbe YEWHEHÓDỌTỌ 10 Bible Online

YEWHEHÓDỌTỌ 10 - gungbe bible

YEWHEHÓDỌTỌ 10

¹Matattun ƙudaje sukan sa man ƙanshi ya yi wari, haka nan wauta kaɗan takan ɓata hikima da daraja.

²Zuciyar mai hikima takan kai shi ga yin abin da yake daidai, amma zuciyar wawa takan kai shi ga yin mugun abu.

³Ko lokacin da wawa yake tafiya a hanya, yakan nuna ba shi da hankali, yakan kuma bayyana wa kowa shi wawa ne.

⁴Idan mai mulki ya husata da kai, kada ka bar inda kake, gama kwantar da hankali yakan sa a yafe manyan laifofi.

⁵Akwai mugunta wadda na gani a duniya, wato kuskuren da masu mulki suke yi.

⁶Ana ba wawaye manyan matsayi, attajirai kuwa ana ƙasƙantar da su.

⁷Na taɓa ganin bayi a kan dawakai, shugabanni kuwa suna tafiya a ƙasa kamar bayi.

⁸Wanda ya haƙa rami shi ne zai fāɗa a ciki. Wanda kuma ya rushe katanga, shi maciji zai sara.

⁹Wanda yake farfasa duwatsu shi za su yi wa rauni. Wanda kuma yake faskare itace yana cikin hatsarinsu.

¹⁰Idan gatari ya dakushe ba a wasa shi ba, dole ne a yi amfani da ƙarfi da yawa, amma hikima takan taimake shi ya ci nasara.

¹¹Idan maciji ya sari mutum kafin a ba shi makarin gardi kuma, ba shi da wani amfani.

¹²Maganar mai hikima alheri ce, amma maganganun wawa za su hallaka shi.

¹³Farkon maganganunsa wauta ne, ƙarshensu kuma mugunta ne da hauka.

¹⁴Wawa ya cika yawan surutu. Wa ya san abin da zai faru nan gaba? Wa zai iya faɗa masa abin da zai faru bayan rasuwarsa?

¹⁵Wahalar wawa takan gajiyar da shi, har bai san hanyar zuwa gari ba.

¹⁶Kaitonki, ya ƙasa wadda sarkinki yaro ne, shugabanninki kuma suna ta shagalinsu tun da safe.

¹⁷Mai farin ciki ce, ke ƙasar da sarkinki mai dattako ne, shugabanninki kuma suka ci a kan kari don su sami ƙarfi, ba domin su bugu ba.

¹⁸Saboda lalaci ɗaki yakan yi yoyo, sai tsaiko ya lotsa.

¹⁹Akan shirya abinci don jin daɗi, ruwan inabi kuwa don faranta zuciya, amma ba za ka sami ko ɗaya ba, sai idan kana da kuɗi.

²⁰Kada ka zagi sarki ko a cikin zuciyarka, kada kuma ka zagi mawadaci a cikin ɗakin kwananka, gama tsuntsu zai kai maganarka, wani taliki mai fikafikai zai tone asirinka.