Read gungbe YEWHEHÓDỌTỌ 7 Bible Online

YEWHEHÓDỌTỌ 7 - gungbe bible

YEWHEHÓDỌTỌ 7

¹Kyakkyawan suna ya fi man ƙanshi tsada, ranar mutuwa kuma ta fi ranar haihuwa.

²Gara a tafi gidan da ake makoki Da a tafi gidan da ake biki, Gama wannan shi ne ƙarshen dukan mutane. Ya kamata duk mai rai ya riƙe wannan a zuciyarsa, Mutuwa tana jiran kowa.

³Baƙin ciki ya fi dariya, Gama baƙin ciki yakan kawo gyara.

⁴Mai hikima yakan yi tunanin mutuwa, Amma wawa yakan yi tunanin shagalin duniya.

⁵Gara mutum ya ji tsautawar mai hikima, Da ya ji wawaye suna yabonsa.

⁶Dariyar wawa kamar ƙarar ƙayar da take karce gindin tukunya ce. Wannan ma aikin banza ne.

⁷Hakika zalunci yakan sa mai hikima ya zama wawa, Karɓar rashawa kuma yakan lalata hali.

⁸Gara ƙarshen abu da farkonsa. Mai haƙuri kuma ya fi mai girmankai.

⁹Ka kame fushinka, Gama wawa ne yake cike da fushi.

¹⁰Kada ka yi tambaya, cewa me ya sa zamanan dā suka fi na yanzu? Gama wannan tambaya ba ta hikima ba ce.

¹¹Ya kamata kowane mutum ya zama mai hikima, Gama tana da kyau kamar cin gādo.

¹²Hikima mafaka ce, takan kāre mutum kamar yadda kuɗi yake yi. Kiyayewar da hikima takan yi wa mai ita, ita ce amfanin ilimi.

¹³Ka yi tunanin aikin Allah, Wa ya isa ya miƙe abin da ya tanƙware?

¹⁴In kana jin daɗi, ka yi murna, In kuma wahala kake sha, ka tuna, Allah ne ya yi duka biyunsa, Don kada mutum ya san abin da zai faru a nan gaba.

¹⁵A kwanakina marasa amfani na ga kowane irin abu. Adali ba safai yakan yi tsawon rai ba, mugu kuwa yakan yi tsawon rai a mugayen ayyukansa.

¹⁶Kada ka cika yin adalci, kada kuma ka cika yin hikima, gama don me za ka kashe kanka?

¹⁷Kada ka cika yin mugunta, kada kuma ka cika yin wauta, gama don me za ka mutu tun kwanakinka ba su cika ba?

¹⁸Idan ka riƙe wannan zai amfane ka. Kada ka bar wancan, gama shi wanda yake tsoron Allah zai yi amfani da su.

¹⁹Abin da hikima take iya yi wa mutum ɗaya ya fi abin da masu mulki goma za su yi wa birni.

²⁰Ba wani mutum a duniyan nan wanda yake aikata abin da yake daidai dukan lokaci, ba tare da yin kuskure ba.

²¹Kada ka kula da kowane abu da mutane suke faɗa, mai yiwuwa ne ka ji baranka yana zaginka.

²²Kai kanka ka sani sau da yawa kakan zagi waɗansu mutane.

²³Na yi amfani da hikimata don in jarraba wannan duka, domin na ɗaura aniya in zama mai hikima, amma abin ya fi ƙarfina.

²⁴Wane ne zai iya sanin gaibi? Abin ya yi mana zurfi ƙwarai, yana da wuyar ganewa.

²⁵Amma na duƙufa neman ilimi, ina ta yin nazari, ina nema in san hikima da amsoshin tambayoyina, in kuma san mugunta da wautar dakikanci.

²⁶Sai na iske wani abu da ya fi mutuwa ɗaci, wato mace wadda ƙaunar da take yi maka za ta kama ka kamar tarko, kamar kuma raga. Rungumewar da za ta yi maka za ta ɗaure ka kamar sarƙa. Wanda Allah yake jin daɗinsa zai tsere mata, amma za ta kama mai zunubi.

²⁷Haka ne, in ji Mai Hadishi, da kaɗan da kaɗan na gane wannan sa'ad da nake neman amsa.

²⁸Amsar da nake nema ban samu ba. Na sami mutum ɗaya mai hikima, wato a cikin mutum dubu, amma daga cikin mata ban sami ko ɗaya ba.

²⁹Wannan ne kaɗai abin da na gane, tsaf Allah ya yi mu, amma mu muka rikitar da kanmu.