Read gungbe OHÀN SỌLỌMỌNI TỌN 7 Bible Online

OHÀN SỌLỌMỌNI TỌN 7 - gungbe bible

OHÀN SỌLỌMỌNI TỌN 7

¹Ƙafafunki suna da kyau da takalmi, Ke mafificiyar budurwa! Tsarin cinyoyinki kamar aikin gwanin sassaƙa ne.

²Cibinki kamar finjali ne, wanda bai taɓa rasa gaurayayyen ruwan inabi a ciki ba. Kwankwasonki kamar damin alkama ne a tsakiyar bi-rana.

³Mamanki kamar bareyi biyu ne, wato tagwayen barewa ne.

⁴Wuyanki kamar hasumiyar hauren giwa ne. Idonki kamar tafki ne cikin birnin Heshbon, Kusa da ƙofar Bat-rabbim. Hancinki kyakkyawa ne kamar hasumiyar Lebanon ta tsaron Dimashƙu.

⁵Kin ɗaga kanki sama kamar Dutsen Karmel. Kitsattsen gashin kanki kamar shunayya mafi kyau ne, Yakan kama hankalin sarki.

⁶Ke kyakkyawa ce ƙaunatacciyata, Kina sa ni jin daɗi a rai.

⁷Kina da kyan gani kamar itacen dabino, Mamanki kamar nonnan dabino.

⁸Zan hau itacen dabino in tsinko 'ya'yan. Mamanki kamar nonnan inabi suke a gare ni. Numfashinki kamar ƙanshin gawasa ne.

⁹Bakinki kamar ruwan inabi mafi kyau ne. Idan haka ne bari ya bulbulo sosai zuwa ga ƙaunataccena, Ya gangara leɓunan masu barci.

¹⁰Ni ta ƙaunataccena ce, yana bukatata.

¹¹Zo saurayina, bari mu tafi waje, Mu kwana a karkara.

¹²Za mu tashi da sassafe, mu duba kurangun inabi, Mu ga ko sun fara tohowa, Ko furanni sun fara buɗewa. Mu ga ko itatuwan rumman sun yi fure. A can zan bayyana maka ƙaunata.

¹³Za ka ji ƙanshin shuke-shuke Da na dukan 'ya'yan itatuwa masu daɗi. Na adana maka jin daɗi na dā da na yanzu, ya ƙaunataccena.