Read gungbe LUKU 1 Bible Online

LUKU 1 - gungbe bible

LUKU 1

¹Tun da yake mutane da yawa sun ɗauka su tsara labarin waɗannan al'amura da suka tabbata a cikinmu,

²daidai yadda waɗanda suke shaidu tun farkon al'amari, masu hidimar Maganar, suka rattaba mana,

³da yake kuma na bi diddigin kowane abu daidai tun farko, ni ma dai na ga ya kyautu in rubuta maka su bi da bi, ya mafifici Tiyofalas,

⁴domin kă san ingancin maganar da aka sanar da kai baki da baki.

⁵A zamanin Hirudus, Sarkin Yahudiya, an yi wani firist mai suna Zakariya, na ƙungiyar Abaija. Yana auren wata a cikin zuriyar Haruna, sunanta Alisabatu.

⁶Dukansu biyu kuwa masu adalci ne a gaban Allah, suna bin umarnin Ubangiji da farillansa duka da halin rashin zargi.

⁷Amma ba su da ɗa, don Alisabatu bakararriya ce, dukansu biyu kuma sun tsufa.

⁸Ana nan, wata rana Zakariya na kan hidima tasa ta firist, a sa'ad da hidimar ta kewayo kan ƙungiyarsu,

⁹bisa ga al'adar hidimar firistoci, sai kuri'a ta nuna shi ne mai shiga Haikalin Ubangiji, ya ƙona turare.

¹⁰A lokacin ƙona turare kuwa duk taron jama'a suna waje, suna addu'a,

¹¹sai wani mala'ikan Ubangiji ya bayyana gare shi, yana tsaye a dama da bagadin ƙona turare.

¹²Da Zakariya ya gan shi ya firgita, tsoro ya kama shi.

¹³Amma mala'ikan ya ce masa, “Kada ka ji tsoro Zakariya, an karɓi addu'arka, matarka Alisabatu za ta haifa maka ɗa, za ka kuma sa masa suna Yahaya.

¹⁴Za ka yi murna da farin ciki, Mutane da yawa kuma za su yi farin ciki da haihuwa tasa.

¹⁵Domin zai zama mai girma a wurin Ubangiji, Ba kuwa zai sha ruwan inabi ko wani abu mai sa maye ba. Za a cika shi da Ruhu Mai Tsarki Tun yana cikin uwa tasa.

¹⁶Zai kuma juyo da Isra'ilawa da yawa ga Ubangiji Allahnsu.

¹⁷Zai riga shi gaba cikin ruhu da iko irin na Iliya. Yă mai da hankalin iyaye a kan 'ya'yansu, Yă kuma juyo da marasa biyayya su bi hikimar adalai, Ya tanada wa Ubangiji jama'a, ya same su a shirye.”

¹⁸Sai Zakariya ya ce wa mala'ikan, “Ta ƙaƙa zan san haka? Ga ni tsoho, maiɗakina kuma ta kwana biyu.”

¹⁹Sai mala'ikan ya amsa ya ce, “Ni ne Jibra'ilu da yake tsaye a gaban Allah. An aiko ni ne in yi maka magana, in kuma yi maka wannan albishir.

²⁰To, ga shi, za ka bebance, ba za ka iya magana ba, sai a ran da al'amuran nan suka auku, don ba ka gaskata maganata ba, za a kuwa cika ta a lokacinta.”

²¹Jama'a suna ta jiran Zakariya, suna mamakin jinkirinsa a Haikali.

²²Da ya fito, ya kāsa yi musu magana. Sai suka gane lalle an yi masa wahayi ne a Haikalin. Sai ya riƙa yi musu nuni, amma ba ya magana.

²³Sa'ad da kuma kwanakin hidimarsa suka cika, ya koma gida.

²⁴Bayan kwanakin nan mata tasa Alisabatu ta yi ciki. Sai ta riƙa ɓuya har wata biyar, tana cewa,

²⁵“Haka Ubangiji ya yi mini a kwanakin da ya dube ni da rahama, domin yă kawar mini da wulakanci a wurin mutane.”

²⁶A wata na shida Allah ya aiko mala'ika Jibra'ilu zuwa wani gari a ƙasar Galili, wai shi Nazarat,

²⁷gun wata budurwa da aka ba da ita ga wani mutum mai suna Yusufu, na zuriyar Dawuda, sunan budurwar kuwa Maryamu.

²⁸Sai mala'ikan ya je wurinta, ya ce, “Salama alaikun, yake zaɓaɓɓiya, Ubangiji yana tare da ke!”

²⁹Amma ta damu ƙwarai da maganar, ta yi ta tunani ko wannan wace irin gaisuwa ce.

³⁰Mala'ikan kuma ya ce mata, “Kada ki ji tsoro, Maryamu, kin sami tagomashi a wurin Allah.

³¹Ga shi kuma, za ki yi ciki, ki haifi ɗa, ki kuma sa masa suna Yesu.

³²Zai zama mai girma, za a kuma kira shi Ɗan Maɗaukaki. Ubangiji Allah zai ba shi kursiyin ubansa Dawuda,

³³Zai kuma mallaki zuriyar Yakubu har abada, Mulkinsa kuwa ba shi da matuƙa.”

³⁴Sai Maryamu ta ce wa mala'ikan, “Ƙaƙa wannan zai yiwu, tun da yake ba a kai ni ɗaki ba?”

³⁵Mala'ikan ya amsa mata ya ce, “Ruhu Mai Tsarki zai sauko miki, Ikon Maɗaukaki kuma zai lulluɓe ki. Saboda haka Mai Tsarkin nan da za a haifa, za a kira shi Ɗan Allah.

³⁶Ga shi kuma, 'yar'uwarki Alisabatu ma ta yi cikin ɗa namiji da tsufanta, wannan kuwa shi ne watanta na shaida, ita da ake ce wa bakararriya.

³⁷Ba wata faɗar Allah da za ta kasa cika.”

³⁸Sai Maryamu ta ce, “To, ga shi, ni baiwar Ubangiji ce, yă zama mini yadda ka faɗa.” Sai mala'ikan ya tashi daga gare ta.

³⁹A kwanakin nan Maryamu ta tashi da hanzari, ta tafi wata ƙasa mai duwatsu, zuwa wani gari na ƙasar Yahuza.

⁴⁰Ta shiga gidan Zakariya ta gai da Alisabatu.

⁴¹Sai ya zamana da Alisabatu ta ji gaisuwar Maryamu, jariri ya motsa da ƙarfi a cikinta. Aka kuwa cika Alisabatu da Ruhu Mai Tsarki,

⁴²har ta tā da murya da ƙarfi, ta ce, “Ke mai albarka ce a cikin mata, ɗan cikinki kuma mai albarka ne!

⁴³Ta yaya wannan alheri ya same ni, har da uwar Ubangijina za ta zo gare ni?

⁴⁴Domin kuwa da jin muryarki ta gaisuwa a kunnena, sai jaririn ya motsa da ƙarfi a cikina domin farin ciki.

⁴⁵Albarka tā tabbata ga wadda ta gaskata, domin za a cika abubuwan da Ubangiji ya aiko a faɗa mata.”

⁴⁶Sai Maryamu ta ce, “Zuciyata na ɗaukaka shi, Ubangiji,

⁴⁷Allah Mai Cetona, da shi ruhuna yake ta farin ciki,

⁴⁸Domin fa shi ya dubi ƙasƙancin baiwa tasa. Ga shi, jama'a ta dukan zamanai, Za su ce mini mai albarka ce nan gaba.

⁴⁹Domin fa shi da yake Mai Iko, Manyan al'amura ya yi mini, Sunansa labudda mai tsarki ne.

⁵⁰Daga zamanai ya zuwa wani zamani, Jinƙansa yana ga waɗanda suke tsoronsa.

⁵¹Manyan ayyuka da ya yi, Masu girmankai, su da dabarbarunsu ya warwatsa.

⁵²Ya firfitar da sarakuna a sarauta, Ya ɗaukaka ƙasƙantattu.

⁵³Mayunwata ya ƙosar da abubuwan alheri, Mawadata kuwa ya sallame su hannu wofi.

⁵⁴Ya taimaka wa baransa Isra'ila, Domin yana tunawa da jinƙansa.

⁵⁵Ya cika faɗarsa ga kakanninmu, Ga Ibrahim da zuriyarsa, har abada.”

⁵⁶Maryamu kuma ta zauna tare da Alisabatu wajen wata uku, sa'an nan ta koma gida.

⁵⁷To, lokacin Alisabatu na haihuwa ya yi, ta kuwa haifi ɗa namiji.

⁵⁸Sai maƙwabta da 'yan'uwanta suka ji yadda Ubangiji ya ji ƙanta ƙwarai, har suka taya ta farin ciki.

⁵⁹Sai ya zamana a rana ta takwas suka zo yi wa ɗan yaron kaciya. A dā za su sa masa sunan ubansa, Zakariya,

⁶⁰amma uwa tasa ta ce, “A'a, Yahaya za a sa masa.”

⁶¹Sai suka ce mata, “Ai kuwa, ba wani ɗan'uwanku mai suna haka.”

⁶²Sai suka alamta wa ubansa, suna neman sunan da yake so a sa masa.

⁶³Sai ya nema a ba shi allo, sa'an nan ya rubuta, “Sunansa Yahaya.” Duka suka yi mamaki.

⁶⁴Nan da nan ya sami baki, kwaɗon harshensa ya saku, ya fara magana, yana yabon Allah.

⁶⁵Sai tsoro ya kama dukan maƙwabtansu. Aka yi ta baza labarin duk waɗannan al'amura ko'ina a dukan ƙasa mai duwatsu ta Yahudiya.

⁶⁶Duk waɗanda suka ji kuwa suka riƙe a zuciyarsu, suna cewa, “Me ke nan ɗan yaron nan zai zama?” Gama ikon Ubangiji yana tare da shi.

⁶⁷Sai aka cika ubansa Zakariya da Ruhu Mai Tsarki, ya yi annabci, ya ce,

⁶⁸“Ubangiji Allahn Isra'ila, A gare shi ne lalle yabo yake tabbata, Domin ya kula, ya yi wa jama'a tasa fansa.

⁶⁹Ya ta da Mai Ceto mai iko dominmu, Daga zuriyar baransa Dawuda.

⁷⁰Yadda tuntuni ya faɗa ta bakunan Annabawa nasa tsarkakan nan,

⁷¹Yă cece mu daga abokan gābanmu, Har ma daga dukan maƙiyanmu.

⁷²Domin nuna jinƙai ne ga kakanninmu, Ya tuna da alkawarinsa mai tsarkin nan.

⁷³Shi ne rantsuwan nan wadda ya yi wa ubanmu Ibrahim,

⁷⁴Domin yana cetonmu daga abokan gābanmu, Mu bauta masa ba da jin tsoro ba,

⁷⁵Sai dai da tsarki da adalci a gabansa, Dukan iyakar kwanakin nan namu.

⁷⁶Kai kuma, ɗan yarona, za a ce da kai annabin Maɗaukaki, Gama za ka riga Ubangiji gaba, Domin ka shisshirya hanyoyinsa,

⁷⁷Kă sanar da ceto ga jama'a tasa, Wato ta samun gafarar zunubansu,

⁷⁸Saboda tsananin jinƙai na Allahnmu, Daga Sama hasken asubahi zai ɓullo mana, Daga can Sama ne fa zai keto mana,

⁷⁹Domin yă haskaka na zaune cikin duhu, Da waɗanda suke zaune a bakin mutuwa, Domin ya bishe mu a hanyar salama.”

⁸⁰Sai ɗan yaron ya girma, ya ƙarfafa a ruhu. Ya kuwa zauna a jeji har ranar bayyanarsa ga Isra'ila.