Read hausa ZABURA 103 Bible Online

ZABURA 103 - hausa bible

ZABURA 103

¹Ka yabi Ubangiji, ya raina! Ka yabi sunansa mai tsarki!

²Ka yabi Ubangiji, ya raina, Kada ka manta da yawan alherinsa.

³Ya gafarta dukan zunubaina, Ya kuma warkar da dukan cuce-cucena.

⁴Ya cece ni daga kabari, Ya sa mini albarka da ƙauna da jinƙai.

⁵Ya cika raina da kyawawan abubuwa, Don in zauna gagau, Ƙaƙƙarfa kamar gaggafa.

⁶Ubangiji yakan yi wa waɗanda ake zalunta shari'a ta gaskiya. Yakan ba su hakkinsu.

⁷Ya faɗa wa Musa shirye-shiryensa. Ya yardar wa jama'ar Isra'ila su ga manyan ayyukansa.

⁸Ubangiji mai jinƙai ne, mai ƙauna ne kuma, Mai jinƙirin fushi ne, cike yake da madawwamiyar ƙauna.

⁹Ba zai yi ta tsautawa kullum ba, Ba zai yi ta jin haushi har abada ba.

¹⁰Yakan yi mana rangwame sa'ad da yake hukunta mu, Ko sa'ad da yake sāka mana saboda zunubanmu da laifofinmu.

¹¹Kamar yadda nisan sararin sama yake bisa kan duniya, Haka kuma girman ƙaunarsa yake ga waɗanda suke tsoronsa.

¹²Kamar yadda gabas take nesa da yamma, Haka nan ne ya nisantar da zunubanmu daga gare mu.

¹³Kamar yadda uba yake yi wa 'ya'yansa alheri, Haka nan kuwa Ubangiji yake yi wa masu tsoronsa alheri.

¹⁴Ubangiji ya san abin da aka yi mu da shi, Yakan tuna, da ƙura aka yi mu.

¹⁵Mutum fa, ransa kamar ciyawa ne, Yakan yi girma, ya yi yabanya kamar furen jeji.

¹⁶Sa'an nan iska ta bi ta kansa, yakan ɓace, Ba mai ƙara ganinsa.

¹⁷Amma ƙaunar Ubangiji ga waɗanda suke girmama shi har abada ce. Alherinsa kuwa tabbatacce ne har dukan zamanai,

¹⁸Ga waɗanda suke riƙe da alkawarinsa da gaskiya, Waɗanda suke biyayya da umarnansa da aminci.

¹⁹Ubangiji ya kafa kursiyinsa a Sama, Shi yake sarautar duka.

²⁰Ku yabi Ubangiji, ku ƙarfafa, ku manyan mala'iku, Ku da kuke biyayya da umarnansa, Kuna kasa kunne ga maganarsa!

²¹Ku yabi Ubangiji, ku dukan ikokin da suke a Sama, Ku yabi Ubangiji, ku bayinsa masu aikata abin da yake so!

²²Ku yabi Ubangiji, dukanku da kuke halittattunsa, A duk inda yake mulki! Ka yabi Ubangiji, ya raina!