Read hausa ZABURA 107 Bible Online

ZABURA 107 - hausa bible

ZABURA 107

¹Ku gode wa Ubangiji, gama shi nagari ne, Ƙaunarsa madawwamiya ce!

²Ku zo mu yabi Ubangiji tare, Dukanku waɗanda ya fansa, Gama ya ƙwato ku daga maƙiyanku.

³Ya komo da ku daga ƙasashen waje, Daga gabas da yamma, kudu da arewa.

⁴Waɗansu suka yi ta kai da kawowa a hamada inda ba hanya, Sun kasa samun hanyar da za ta kai su garin da za su zauna a ciki.

⁵Suka yi ta fama da yunwa, da ƙishirwa, Suka fid da zuciya ga kome.

⁶Cikin wahalarsu suka yi kira ga Ubangiji, Ya kuwa cece su daga wahalarsu.

⁷Ya fisshe su, ya bi da su sosai, Zuwa birnin da za su zauna.

⁸Dole ne su gode wa Ubangiji saboda madawwamiyar ƙaunarsa, Sabili da abubuwa masu banmamaki waɗanda ya aikata dominsu!

⁹Ya shayar da waɗanda suke jin ƙishirwa, Ya kuma ƙosar da mayunwata da alheransa.

¹⁰Waɗansu suna zaune cikin duhu da inuwar mutuwa, 'Yan sarƙa suna shan wahala da sarƙoƙi,

¹¹Saboda sun tayar, sun ƙi bin umarnan Allah Maɗaukaki, Sun kuwa ƙi koyarwarsa.

¹²Suka gaji tiƙis saboda tsananin aiki, Za su faɗi ƙasa, ba mataimaki.

¹³A cikin wahalarsu suka yi kira ga Ubangiji, Ya kuwa cece su daga wahalarsu.

¹⁴Ya fisshe su daga cikin duhu da inuwar mutuwa, Ya tsintsinka sarƙoƙinsu.

¹⁵Dole su gode wa Ubangiji saboda madawwamiyar ƙaunarsa, Sabili da abubuwa masu banmamaki waɗanda ya aikata dominsu.

¹⁶Ya kakkarya ƙofofin da aka yi da tagulla. Ya kuma ragargaza ƙyamaren da aka yi da baƙin ƙarfe.

¹⁷Waɗansu suka yi ciwo sabili da zunubansu, Suna ta shan wahala saboda muguntarsu.

¹⁸Ba su so su ga abinci, Sun kusa mutuwa.

¹⁹A cikin wahalarsu suka yi kira ga Ubangiji, Ya kuwa cece su daga azabar da suke sha.

²⁰Da umarninsa ya warkar da su, Ya cece su daga kabari.

²¹Dole su gode wa Ubangiji saboda madawwamiyar ƙaunarsa, Sabili da abubuwa masu banmamaki waɗanda ya aikata dominsu.

²²Dole su gode masa, su miƙa masa hadayu, Su raira waƙoƙin murna, Su faɗi dukan abin da ya yi!

²³Waɗansu suka yi tafiya a teku da jirage, Suna samun abin zaman garinsu daga tekuna.

²⁴Suka ga abin da Ubangiji ya aikata, Ayyukansa masu banmamaki waɗanda ya yi a tekuna.

²⁵Ya ba da umarni, sai babbar iska ta tashi, Ta fara hurowa, ta sa raƙuman ruwa su tashi.

²⁶Aka ɗaga jiragen ruwa sama, Sa'an nan suka tsinduma cikin zurfafa. Da mutanen suka ga irin hatsarin da suke ciki, Sai zuciyarsu ta karai.

²⁷Suka yi ta tuntuɓe suna ta tangaɗi kamar bugaggu, Gwanintarsu duka ta zama ta banza.

²⁸Cikin wahalarsu suka yi kira ga Ubangiji, Ya kuwa cece su daga azabarsu.

²⁹Ya sa hadiri ya yi tsit, Raƙuman ruwa kuma suka yi shiru.

³⁰Suka yi murna saboda wurin ya yi shiru, Ya kuma kai su kwatar jiragen ruwa lafiya, Wurin da suke so.

³¹Dole su gode wa Ubangiji saboda madawwamiyar ƙaunarsa, Sabili da abubuwa masu banmamaki waɗanda ya aikata dominsu.

³²Dole su yi shelar girmansa cikin taron jama'a, Su kuma yabe shi a gaban majalisar dattawa.

³³Ubangiji ya sa koguna suka ƙafe ƙaƙaf, Ya hana maɓuɓɓugai su gudana.

³⁴Ya mai da ƙasa mai dausayi ta zama mai gishiri, marar amfani, Saboda muguntar waɗanda suke zaune a can.

³⁵Ya sāke hamada ta zama tafkunan ruwa, Ya kuma mai da busasshiyar ƙasa ta zama maɓuɓɓugai masu gudana.

³⁶Ya bar mayunwata su zauna a can, Suka kuwa gina birni don su zauna a ciki.

³⁷Suka shuka gonaki suka dasa kurangar inabi, Waɗanda suka ba da amfani mai yawan gaske.

³⁸Ya sa wa jama'arsa albarka, Suka kuwa haifi 'ya'ya da yawa. Bai bar garkunan shanunsu su ragu ba.

³⁹Sa'ad da aka ci nasara a kan jama'ar Allah, Aka ƙasƙantar da su ta wurin mugun zalunci, Da wahalar da aka yi musu.

⁴⁰Sai Allah ya wulakanta waɗanda suka zalunci jama'arsa. Ya sa su suka yi ta kai da kawowa A hamada inda ba hanya.

⁴¹Ya tsamo masu bukata daga cikin baƙin cikinsu, Ya sa iyalansu su riɓaɓɓanya kamar garkunan tumaki.

⁴²Da adalai suka ga wannan, sai suka yi murna, Mugaye kuwa aka rufe bakinsu.

⁴³Da ma a ce masu hikima Za su yi tunani a kan waɗannan abubuwa, Da ma kuma su yarda Da madawwamiyar ƙaunar Ubangiji.