Read hausa ZABURA 118 Bible Online

ZABURA 118 - hausa bible

ZABURA 118

¹Ku gode wa Ubangiji, Domin shi mai alheri ne, Ƙaunarsa kuwa tabbatacciya ce.

²Bari jama'ar Isra'ila su ce, “Ƙaunarsa kuwa tabbatacciya ce.”

³Bari dukan firistoci na Allah su ce, “Ƙaunarsa kuwa tabbatacciya ce.”

⁴Bari dukan waɗanda suke tsoronsa su ce, “Ƙaunarsa kuwa tabbatacciya ce.”

⁵A cikin wahalata na yi kira ga Ubangiji Ya kuwa amsa mini, ya kuɓutar da ni.

⁶Ubangiji yana tare da ni, ba zan ji tsoro ba. Me mutane za su iya yi mini?

⁷Ubangiji ne yake taimakona, Zan kuwa ga fāɗuwar maƙiyana da idona.

⁸Gwamma a dogara ga Ubangiji, Da a dogara ga mutane.

⁹Gwamma a dogara ga Ubangiji, Da a dogara ga shugabanni na mutane kawai.

¹⁰Ma ƙiya da yawa sun kewaye ni, Amma na hallaka su ta wurin ikon Ubangiji!

¹¹Suka kewaye ni a kowane gefe Amma na hallaka su ta wurin ikon Ubangiji!

¹²Suka rufe ni kamar ƙudan zuma, Amma suka ƙone nan da nan kamar wutar jeji, Ta wurin ikon Ubangiji na hallaka su!

¹³Aka auko mini da tsanani, Har aka kore ni, Amma Ubangiji ya taimake ni.

¹⁴Ubangiji yakan ba ni iko, ya ƙarfafa ni, Shi ne Mai Cetona!

¹⁵Ku kasa kunne ga sowar murna ta nasara A cikin alfarwan jama'ar Allah. “Ikon Ubangiji mai girma ne ya aikata wannan!

¹⁶Ikonsa ne ya kawo mana nasara, Babban ikonsa a wurin yaƙi!”

¹⁷Ba zan mutu ba, amma rayuwa zan yi, Don in ba da labarin abin da Ubangiji ya yi.

¹⁸Ya hukunta ni da hukunci mai tsanani, Amma bai kashe ni ba.

¹⁹A buɗe mini ƙofofin Haikali, Zan shiga ciki in yabi Ubangiji!

²⁰Wannan ƙofar Ubangiji ce, Sai adalai kaɗai suke shiga ciki!

²¹Ina yabonka, ya Ubangiji, domin ka ji ni, Domin ka ba ni nasara!

²²Dutsen da magina suka ƙi, wai ba shi da amfani, Sai ya zama shi ya fi duka amfani.

²³Ubangiji ne ya yi haka, Wannan kuwa abin banmamaki ne!

²⁴Wace irin rana ce haka da Ubangiji ya ba mu! Bari mu yi farin ciki, mu yi biki!

²⁵Ka cece mu, ya Ubangiji, ka cece mu! Ka ba mu nasara, ya Ubangiji!

²⁶Allah yakan sa wa wanda ya zo da sunan Ubangiji albarka! Daga Haikalin Ubangiji muke yabonka!

²⁷Ubangiji shi ne Allah, yana yi mana alheri, Ku ɗauki hadayunku ku yi ta idi, Ku ɗaura su a zankayen bagade.

²⁸Kai ne Allahna, kai nake yi wa godiya, Zan yi shelar girmanka.

²⁹Ku gode wa Ubangiji, gama nagari ne, Ƙaunarsa kuwa tabbatacciya ce.