Read hausa ZABURA 135 Bible Online

ZABURA 135 - hausa bible

ZABURA 135

¹Ku yabi Ubangiji! Ku yabi sunansa, ku bayin Ubangiji,

²Ku da kuke tsaye a Haikalin Ubangiji, A wuri mai tsarki na Allahnmu.

³Ku yabi Ubangiji, domin nagari ne shi, Ku raira yabbai ga sunansa, domin shi mai alheri ne.

⁴Ya zaɓar wa kansa Yakubu, Jama'ar Isra'ila kuwa tasa ce.

⁵Na sani Ubangijinmu mai girma ne, Ya fi dukan alloli girma.

⁶Yana aikata dukan abin da ya ga dama a Sama ko a duniya, A tekuna, da kuma zurfafan da suke ƙarƙas.

⁷Yakan kawo gizagizan hadiri daga bangayen duniya, Yakan yi walƙiya domin hadura, Yakan fito da iska daga cikin taskarsa.

⁸A Masar ne ya karkashe 'ya'yan fari na mutane da na dabbobi.

⁹A can ne ya aikata mu'ujizai da al'ajabai, Domin ya hukunta Fir'auna da dukan hukumar ƙasarsa.

¹⁰Ya hallakar da sauran al'umma masu yawa, Ya karkashe sarakuna masu iko, wato

¹¹Sihon, Sarkin Amoriyawa, da Og, Sarkin Bashan, Da dukan sarakunan Kan'ana.

¹²Ya ba da ƙasarsu ga jama'arsa, Ya ba da ita ga Isra'ila.

¹³Ya Ubangiji, kullayaumi mutane za su sani kai ne Allah, Dukan tsararraki za su tuna da kai.

¹⁴Ubangiji zai ji juyayin mutanensa, Zai 'yantar da bayinsa.

¹⁵Gumakan al'ummai, da azurfa da zinariya aka yi su, Hannuwan mutane ne suka siffata su.

¹⁶Suna da bakuna, amma ba sa magana, Da idanu, amma ba sa gani.

¹⁷Suna da kunnuwa, amma ba sa ji, Ba kuma numfashi a bakinsu.

¹⁸Ka sa su waɗanda suka yi su, Da dukan waɗanda suke dogara gare su, Su zama kamar gumakan da suka yi!

¹⁹Ku yabi Ubangiji, ya jama'ar Isra'ila, Ku yabe shi, ya ku firistocin Allah!

²⁰Ku yabi Ubangiji, ya ku Lawiyawa, Ku yabe shi, dukanku da kuke tsoronsa!

²¹Ku yabi Ubangiji a Sihiyona da a Urushalima, wato a Haikalinsa. Ku yabi Ubangiji!