Read hausa ZABURA 144 Bible Online

ZABURA 144 - hausa bible

ZABURA 144

¹Yabo ya tabbata ga Ubangiji, mai kiyaye ni, Ya hore ni don yaƙi, Ya kuwa shirya ni don yaƙi.

²Shi yake kiyaye ni, Shi yake kāre ni, Shi ne mafakata da Mai Cetona, Wanda nake dogara gare shi Don samun zaman lafiya. Shi ne ya ɗora ni a kan al'ummai.

³Ya Ubangiji wane ne mutum, har da kake lura da shi? Wane ne ɗan adam kurum, har da kake kulawa da shi?

⁴Shi kamar hucin iska yake, Kwanakinsa kuwa kamar inuwa mai wucewa ne.

⁵Ya Ubangiji, ka kware sararin sama, ka sauko, Ka taɓa duwatsu, don su tuƙaƙo da hayaƙi.

⁶Ka aiko da walƙiyar tsawa ta warwatsa maƙiyanka, Ka harba kibanka, ka sa su sheƙa a guje!

⁷Ka sunkuyo daga Sama, Ka tsamo ni daga cikin ruwa mai zurfi, ka cece ni, Ka cece ni daga ikon baƙi,

⁸Waɗanda ba su taɓa faɗar gaskiya ba, Sukan yi rantsuwar ƙarya.

⁹Zan raira maka sabuwar waƙa, ya Allah, Zan kaɗa garaya in raira maka waƙa.

¹⁰Ka ba sarakuna nasara, Ka kuma ceci bawanka Dawuda.

¹¹Ka cece ni daga mugayen abokan gābana, Ka ƙwato ni daga ikon baƙi, Waɗanda ba su taɓa faɗar gaskiya ba, Sukan yi rantsuwar ƙarya.

¹²Ka sa 'ya'yanmu maza waɗanda suke cikin samartaka, Su zama kamar itatuwan da yake girma da ƙarfi. Ka sa 'ya'yanmu mata Su zama kamar al'amudai, Waɗanda suke adanta kusurwoyin fāda.

¹³Ka sa rumbunanmu su cika Da kowane irin amfanin gona. Ka sa tumakin da suke cikin saurukanmu Su hayayyafa dubu dubu har sau goma,

¹⁴Ka sa shanunmu su hayayyafa, Kada su yi ɓari ko su ɓace. Ka sa kada a ji kukan damuwa a kan titunanmu!

¹⁵Mai farin ciki ce al'ummar Da abin nan da aka faɗa ya zama gaskiya a gare ta. Masu farin ciki ne jama'ar da Allahnsu shi ne Ubangiji!