Read hausa ZABURA 147 Bible Online

ZABURA 147 - hausa bible

ZABURA 147

¹Yabo ya tabbata ga Ubangiji! Abu mai kyau ne mu yabi Allahnmu, Abu mai daɗi ne, daidai ne kuma, a yabe shi.

²Ubangiji yana rayar da Urushalima, Yana komo da waɗanda aka kai su baƙunci a wata ƙasa.

³Yakan warkar da masu karyayyiyar zuciya, Yakan ɗaure raunukansu.

⁴Ya ƙididdige yawan taurari, Yakan kira kowanne da sunansa.

⁵Ubangijinmu mai girma ne, Mai Iko Dukka, Saninsa ya fi gaban aunawa.

⁶Yakan ɗaukaka masu tawali'u, Amma yakan ragargaza mugaye har ƙasa.

⁷Ku raira waƙar yabo ga Ubangiji, Ku yabi Allah da garaya.

⁸Ya shimfiɗa gajimare a sararin al'arshi. Ya tanada wa duniya ruwan sama, Ya sa ciyayi su tsiro a kan tuddai.

⁹Yakan ba dabbobi abincinsu, Yakan ciyar da 'ya'yan hankaki sa'ad da suka yi kuka gare shi.

¹⁰Ba ya jin daɗin ƙarfafan dawakai, Ba ya murna da jarumawan mayaƙa.

¹¹Amma yana jin daɗin waɗanda suke tsoronsa, Yana jin daɗin waɗanda suke dogara da madawwamiyar ƙaunarsa.

¹²Ya Urushalima, ki yabi Ubangiji, Ya Sihiyona, ki yabi Allahnki.

¹³Shi yake riƙe da ƙofofinki da ƙarfi, Yakan sa wa jama'arki albarka.

¹⁴Yakan kiyaye kan iyakar ƙasarki lafiya, Yakan kuma ƙosar da ke da alkama mafi kyau.

¹⁵Yakan ba da umarni, Nan da nan umarnin yakan iso duniya.

¹⁶Yakan aiko da dusar ƙanƙara mai kauri kamar ulu, Ya watsa jaura kamar ƙura.

¹⁷Yakan aiko da ƙanƙara kamar duwatsu, Ba wanda yake iya jurewa da sanyin da yakan aiko!

¹⁸Sa'an nan yakan ba da umarni, Ƙanƙara kuwa ta narke, Yakan aiko da iska, ruwa kuwa yakan gudu.

¹⁹Yana ba Yakubu saƙonsa, Koyarwarsa da dokokinsa kuma ga Isra'ila.

²⁰Bai yi wa sauran al'umma wannan ba, Domin ba su san dokokinsa ba. Yabo ya tabbata ga Ubangiji!