Read hausa ZABURA 148 Bible Online

ZABURA 148 - hausa bible

ZABURA 148

¹Yabo ya tabbata ga Ubangiji! Ku yabi Ubangiji daga sama, Ku da kuke zaune a tuddan sama.

²Ku yabe shi dukanku mala'ikunsa, Ku yabe shi, ku dukan rundunansa na sama!

³Ku yabe shi, ku rana da wata, Ku yabe shi, ku taurari masu haskakawa!

⁴Ku yabe shi, ku sammai mafi tsayi duka! Ku yabe shi, ku ruwayen da kuke bisa sararin sama!

⁵Bari su duka su yabi sunan Ubangiji! Ya umarta, sai suka kasance.

⁶Ta wurin umarninsa aka kafa su A wurarensu har abada, Ba su kuwa da ikon ƙi.

⁷Ku yabi Ubangiji daga duniya, Ku yabi Ubangiji, ku dodanin ruwa da dukan zurfafan teku.

⁸Ku yabe shi, ku walƙiya, da ƙanƙara, da dusar ƙanƙara, Da gizagizai, da ƙarfafan iska waɗanda suke biyayya da umarnansa!

⁹Ku yabe shi, ku tuddai da duwatsu, Da itatuwa 'ya'ya da kurama.

¹⁰Ku yabe shi dukanku dabbobi, na gida da na jeji, Masu rarrafe da tsuntsaye!

¹¹Ku yabe shi, ku sarakuna da dukan kabilai, Ku yabe shi, ku shugabanni da dukan hukumomi.

¹²Ku yabe shi ku samari da 'yan mata! Ku yabe shi, ku tsoffafi da yara!

¹³Bari dukansu su yabi sunan Ubangiji, Sunansa ya fi dukan sauran sunaye girma, Ɗaukakarsa kuwa tana bisa duniya da samaniya!

¹⁴Ya sa al'ummarsa ta yi ƙarfi, Domin dukan jama'arsa su yabe shi Jama'arsa Isra'ila, wadda yake ƙauna ƙwarai! Yabo ya tabbata ga Ubangiji!