Read hausa ZABURA 25 Bible Online

ZABURA 25 - hausa bible

ZABURA 25

¹A gare ka nake yin addu'a, ya Ubangiji,

²A gare ka nake dogara, ya Allah. Ka cece ni daga shan kunyar fāɗuwa, Kada ka bar magabtana su yi mini duban wulakanci!

³Waɗanda suke dogara gare ka, Ba za su kasa yin nasara ba, Sai dai waɗanda suke gaggawa su yi maka tayarwa.

⁴Ka koya mini al'amuranka, ya Ubangiji, Ka sa su zama sanannu a gare ni.

⁵Ka koya mini in yi zamana bisa ga gaskiyarka, Gama kai Mai Cetona ne. Dukan yini ina dogara a gare ka.

⁶Ya Ubangiji, ka tuna da alherinka da madawwamiyar ƙaunarka, Waɗanda ka nuna tun a dā.

⁷Ka gafarta zunubaina da kurakuraina masu yawa na ƙuruciyata. Saboda madawwamiyar ƙaunarka da alherinka, Ka tuna da ni, ya Ubangiji!

⁸Ubangiji mai adalci ne, mai alheri, Yana koya wa masu zunubi tafarkin da za su bi.

⁹Yana bi da masu tawali'u a tafarkin da suke daidai, Yana koya musu nufinsa.

¹⁰Da ƙauna da aminci yana bi da dukan waɗanda suke biyayya da alkawarinsa da umarnansa.

¹¹Ka cika alkawarinka, ya Ubangiji, ka gafarta zunubaina, gama suna da yawa.

¹²Waɗanda suke biyayya da Ubangiji Za su koyi hanyar da za su bi daga gare shi.

¹³Kullayaumi za su arzuta, 'Ya'yansu kuma za su zauna lafiya a ƙasar.

¹⁴Ubangiji yakan amince da waɗanda suke biyayya da shi, Yakan koya musu alkawarinsa.

¹⁵A koyaushe ga Ubangiji nake neman taimako, Yakan kuɓutar da ni daga hatsari.

¹⁶Ka juyo wajena, ya Ubangiji, ka yi mini jinƙai, Gama ina zaman kaɗaici da rashin ƙarfi.

¹⁷Damuwar zuciyata ta yi yawa, Ka raba ni da dukan damuwa, Ka cece ni daga dukan wahalata.

¹⁸Ka kula da wahalata da azabata, Ka gafarta dukan zunubaina.

¹⁹Ka duba yawan magabtan da nake da su, Dubi irin ƙiyayyar da suke yi mini!

²⁰Ka yi mini kāriya, ka cece ni, Gama na zo wurinka neman kāriya.

²¹Ka sa nagartata da amincina su kiyaye ni, Gama na dogara gare ka.

²²Ka fanshi jama'arka daga dukan wahalarsu, ya Allah!