Read hausa ZABURA 29 Bible Online

ZABURA 29 - hausa bible

ZABURA 29

¹Ku yabi Ubangiji, ku alloli, Ku yabi ɗaukakarsa da ikonsa.

²Ku yabi sunan Ubangiji mai daraja, Ku rusuna a gaban Mai Tsarki sa'ad da ya bayyana.

³An ji muryar Ubangiji a kan tekuna, Allah Maɗaukaki ya yi tsawa, Tsawar muryarsa kuwa ta yi amsa kuwa a bisa teku.

⁴An ji muryar Ubangiji A dukan ikonsa da zatinsa!

⁵Muryar Ubangiji takan karya itatuwan al'ul, Har ma da itatuwan al'ul na Lebanon.

⁶Yakan sa duwatsun Lebanon su yi tsalle kamar 'yan maruƙa, Ya kuma sa Dutsen Harmon ya yi tsalle kamar ɗan maraƙi.

⁷Muryar Ubangiji ta sa walƙiya ta walƙata.

⁸Muryarsa ta sa hamada ta girgiza, Ta girgiza hamadar Kadesh.

⁹Muryar Ubangiji ta sa barewa ta haihu, Ta sa itatuwa su kakkaɓe, Sa'ad da aka yi sowa a cikin Haikalinsa, Aka ce, “Daukaka ga Allah!”

¹⁰Ubangiji yana sarautar ruwa mai zurfi, Yana sarauta kamar sarki har abada.

¹¹Ubangiji yana ba jama'arsa ƙarfi, Ya sa musu albarka da salama.