Read hausa ZABURA 33 Bible Online

ZABURA 33 - hausa bible

ZABURA 33

¹Dukanku adalai ku yi murna, A kan abin da Ubangiji ya yi, Ku yabe shi, ku da kuke masa biyayya!

²Ku kaɗa garaya, kuna yi wa Ubangiji godiya. Ku raira masa waƙa, da kayan kaɗe-kaɗe masu tsarkiya.

³Ku raira masa sabuwar waƙa, Ku kaɗa garaya da gwaninta, Ku kuma raira waƙa da ƙarfi!

⁴Kalmomin Ubangiji gaskiya ne, Ayyukansa duka kuwa abin dogara ne.

⁵Ubangiji yana ƙaunar abin da yake na adalci da gaskiya, Madawwamiyar ƙaunarsa ta cika duniya.

⁶Ubangiji ya halicci duniya da umarninsa, Rana, da wata, da taurari kuma bisa ga maganarsa.

⁷Ya tattara tekuna wuri ɗaya. Ya rurrufe zurfafan teku a ɗakunan ajiya.

⁸Bari duk duniya ta ji tsoron Ubangiji! Ku ji tsoronsa ku mutanen duniya!

⁹Da magana ya halicci duniya, Ta wurin umarninsa kowane abu ya bayyana.

¹⁰Ubangiji yakan sassoke manufofin sauran al'umma, Yakan hana su aikata shirye-shiryensu.

¹¹Amma shirye-shiryensa sukan tabbata har abada. Nufe-nufensa kuma dawwamammu ne har abada.

¹²Mai farin ciki ce al'ummar da Ubangiji yake Allahnta, Masu farin ciki ne jama'ar da Ubangiji ya zaɓo wa kansa!

¹³Daga Sama Ubangiji ya dubo dukan 'yan adam.

¹⁴Daga inda yake mulki, yakan dubo dukan mazaunan duniya.

¹⁵Shi ya siffata tunaninsu, yana sane da dukan abin da suke yi.

¹⁶Ba saboda ƙarfin mayaƙa sarki yakan ci nasara ba, Mayaƙi ba yakan yi rinjaye saboda ƙarfinsa ba.

¹⁷Dawakan yaƙi ba su da amfani don cin nasara, Ƙarfin nan nasu ba zai iya ceto ba.

¹⁸Ubangiji yana kiyaye masu tsoronsa, Waɗanda suke dogara ga madawwamiyar ƙaunarsa.

¹⁹Yakan cece su daga mutuwa, Yakan rayar da su a lokacin yunwa.

²⁰Ga Ubangiji muke sa zuciya, Shi mai taimakonmu ne, mai kiyaye mu.

²¹Saboda da shi muke murna, Muna dogara ga sunansa mai tsarki.

²²Ka sa madawwamiyar ƙaunarka ta kasance tare da mu, ya Ubangiji, Da yake a gare ka muke sa zuciya.