Read hausa ZABURA 44 Bible Online

ZABURA 44 - hausa bible

ZABURA 44

¹Da kunnuwanmu muka ji, ya Allah, Kakanninmu suka faɗa mana, Manya manyan abubuwa da ka aikata a lokacinsu, A zamanin dā,

²Yadda kai da kanka ka kori arna, Ka dasa jama'arka a ƙasarsu, Yadda ka hori sauran al'umma, Amma ka sa jama'arka su wadata.

³Ba da takubansu suka ci ƙasar ba, Ba kuwa da ikonsu suka rinjayi ƙasar ba, Amma da ikonka ne da kuma ƙarfinka, Ta wurin tabbatar musu kana tare da su, Kana nuna musu kana ƙaunarsu.

⁴“Ya Allah, kai ne Sarkina, Ka ba jama'arka nasara.

⁵Da ikonka muka kori abokan gābanmu, Saboda kasancewarka tare da mu Muka rinjayi magabtanmu.

⁶Ban dogara ga bakana ba, Takobina kuwa ba zai cece ni ba.

⁷Amma ka cece mu daga abokan gābanmu, Ka kori waɗanda suke ƙinmu.

⁸Za mu yabe ka kullum, Mu yi maka godiya har abada.”

⁹Amma yanzu, ya Allah, ka yashe mu, Ka bari aka kore mu, Ba ka ƙara fita ka yi tafiya tare da sojojinmu ba.

¹⁰Ka sa muka gudu daga gaban abokan gābanmu, Suka ƙwace abin da muke da shi.

¹¹Ka bari aka yanyanka mu kamar tumaki, Ka warwatsar da mu a baƙuwar ƙasa.

¹²Ka sayar da jama'arka A bakin 'yan kuɗi ƙalilan, Ba ka ci ribar cinikin ba.

¹³Maƙwabtanmu suna yi mana dariya saboda kai, Suna yi mana ba'a, sun maishe mu abin wasa.

¹⁴Ka maishe mu abin raini a wurin arna, Suna kaɗa mana kai, suna raina mu.

¹⁵Kullum a cikin kunya nake, Kunya ta lulluɓe ni ɗungum,

¹⁶Saboda dukan wulakanci, Da zagin da nake sha daga maƙiyana da abokan gābana.

¹⁷Dukan wannan ya same mu, Ko da yake ba mu manta da kai ba, Ba mu kuma ta da alkawarin da ka yi da mu ba.

¹⁸Ba mu ci amanarka ba, Ba mu ƙi yin biyayya da umarnanka ba.

¹⁹Duk da haka ka ƙi taimakonmu da namomin jejin nan, Ka bar mu a cikin duhu baƙi ƙirin.

²⁰Da a ce mun daina yin sujada ga Allahnmu, Muka yi addu'a ga gumaka,

²¹Hakika ka gane, Domin ka san asirin tunanin mutane.

²²Ya Allah, saboda kai ne ake karkashe mu a kowane lokaci, Ake kuma maishe mu kamar tumakin da za a yanyanka.

²³Ka tashi, ya Ubangiji! Me ya sa kake zama kamar mai barci? Ka tashi! Kada ka yashe mu har abada!

²⁴Me ya sa ka ɓuya mana? Kada ka manta da ƙuncinmu da wahalarmu!

²⁵Mun fāɗi, an turmushe mu a ƙasa, An bar mu kwance cikin ƙura.

²⁶Ka tashi ka taimake mu! Ka fanshe mu saboda madawwamiyar ƙaunarka!