Read hausa ZABURA 51 Bible Online

ZABURA 51 - hausa bible

ZABURA 51

¹Ka yi mini jinƙai, ya Allah, Sabili da madawwamiyar ƙaunarka. Ka shafe zunubaina, Saboda jinƙanka mai girma!

²Ka wanke muguntata sarai, Ka tsarkake ni daga zunubina!

³Na gane laifina, Kullum ina sane da zunubina.

⁴Na yi maka zunubi, kai kaɗai na yi wa, Na kuwa aikata mugunta a gare ka. Daidai ne shari'ar da ka yi mini, Daidai ne ka hukunta ni.

⁵Mugu ne ni tun lokacin da aka haife ni, Mai zunubi ne ni tun daga ranar da aka haife ni.

⁶Amintacciyar zuciya ita kake so, Ka cika tunanina da hikimarka.

⁷Ka kawar da zunubina, zan kuwa tsarkaka, Ka wanke ni, zan kuwa fi auduga fari.

⁸Bari in ji sowa ta farin ciki da murna. Ko da yake ka ragargaza ni, Ka kakkarya ni, duk da haka zan sāke yin murna.

⁹Ka kawar da fuskarka daga zunubaina, Ka shafe duk muguntata.

¹⁰Ka halitta tsarkakakkiyar zuciya a cikina, ya Allah, Ka sa sabon halin biyayya a cikina.

¹¹Kada ka kore ni daga gabanka, Kada ka ɗauke mini Ruhunka Mai Tsarki.

¹²Ka sāke mayar mini da farin ciki na cetonka, Ka ƙarfafa ni da zuciya ta biyayya.

¹³Sa'an nan zan koya wa masu zunubi umarnanka, Za su kuwa komo wurinka.

¹⁴Ka rayar da raina, ya Allah Mai Cetona, Zan kuwa yi shelar adalcinka da farin ciki.

¹⁵Ka taimake ni in yi magana, ya Ubangiji, Zan kuwa yabe ka.

¹⁶Ba ka son sadakoki, ai, da na ba ka, Ba ka jin daɗin hadayun ƙonawa.

¹⁷Hadayata, ita ce halin ladabi, ya Allah, Zuciya mai ladabi da biyayya, Ba za ka ƙi ba, ya Allah.

¹⁸Ya Allah, ka yi wa Sihiyona alheri, ka taimake ta, Ka sāke gina garun Urushalima.

¹⁹Sa'an nan za ka ji daɗin hadaya ta ainihi, Da dukan hadayun ƙonawa. Za a miƙa bijimai hadayu a bisa bagadenka.