Read hausa ZABURA 56 Bible Online

ZABURA 56 - hausa bible

ZABURA 56

¹Ka yi mini jinƙai, ya Allah, Gama mutane sun tasar mini, Maƙiyana suna tsananta mini koyaushe!

²Dukan yini maƙiyana suna tasar mini, Waɗanda suke faɗa da ni sun cika yawa.

³Sa'ad da nake jin tsoro, ya Maɗaukaki, A gare ka nake dogara.

⁴Ga Allah nake dogara, ina yabon alkawarinsa, Gare shi na dogara, ba zan ji tsoro ba. Me mutum kawai zai yi mini?

⁵Maƙiyana suke ta wahalshe ni dukan yini, A kan kowane abu da nake yi, Kullum suna ta tunanin yadda za su cuce ni!

⁶Sukan taru a ɓoye, Suna kallon duk abin da nake yi. Suna sa zuciya za su iya kashe ni.

⁷Ka hukunta su, ya Allah saboda muguntarsu, Da fushinka ka kori waɗannan mutane!

⁸Ka san irin wahalar da nake sha, Kana riƙe da lissafin yawan hawayena. Ashe, ba a rubuce suke a littafinka ba?

⁹A ranar da na yi kira gare ka, Za a komar da abokan gābana baya, Gama na sani Allah yana tare da ni!

¹⁰Ina dogara ga Allah, ina yabon alkawarinsa, Ina dogara ga Ubangiji, ina yabon alkawarinsa.

¹¹A gare shi nake dogara, Ba zan ji tsoro ba. Me mutum kawai zai yi mini?

¹²Zan miƙa maka abin da na yi alkawari, ya Allah, Zan miƙa maka hadaya ta godiya.

¹³Domin ka cece ni daga mutuwa, Ka hana a ci nasara a kaina. Saboda haka a gaban Allah nake tafiya A hasken da yake haskaka wa masu rai.