Read hausa ZABURA 59 Bible Online

ZABURA 59 - hausa bible

ZABURA 59

¹Ka cece ni daga maƙiyana, ya Allahna, Ka kiyaye ni daga waɗanda suka tasar mini!

²Ka cece ni daga waɗannan mugaye, Ka tsirar da ni daga masu kisankan nan!

³Duba! Suna jira su auka mini, Mugaye suna taruwa gāba da ni, Ba domin wani zunubi ko wani laifin da na yi ba,

⁴Ba domin na yi wani laifi ba, ya Ubangiji, Har da suka gaggauta gāba da ni. Kai da kanka ka gani, ya Allah na Isra'ila! Ka tashi ka taimake ni.

⁵Ka tashi, ya Ubangiji, Allah Maɗaukaki, ka taimake ni, Ka tashi ka hukunta al'ummai, Kada ka yi wa waɗannan mugaye, maciya amana, jinƙai!

⁶Da maraice suka komo, Suna yaƙe haƙora kamar karnukan da suke yawo ko'ina a birni.

⁷Ji abin da suke fada! Harsunansu suna kama da takuba a bakinsu, Duk da haka suna ta tambaya, suna cewa, “Wa zai ji mu?”

⁸Amma kai dariya kake yi musu, ya Ubangiji, Ka mai da al'ummai duka abin bandariya!

⁹Mai tsarona, kai ne kake kiyaye ni, Kai ne mafakata, ya Allah.

¹⁰Allahna wanda yake ƙaunata, zai zo gare ni, Zai sa in ga an kori magabtana.

¹¹Kada ka kashe su, ya Allah, don kada jama'ata su manta. Ka watsar da su da ikonka, ka hallaka su ya Ubangiji mai kiyaye mu!

¹²Zunubi na cikin leɓunansu, maganganunsu na zunubi ne, Da ma a kama su saboda girmankansu, Domin suna la'antarwa, suna ƙarya!

¹³Da fushinka ka hallaka su, Ka hallaka su ɗungum. Sa'an nan jama'a za su sani Allah yana mulkin Isra'ila, Mulkinsa ya kai ko'ina a duniya!

¹⁴Da maraice maƙiyana suka komo, Suna yaƙe haƙora kamar karnukan da suke yawo ko'ina a birni.

¹⁵Suna kai da kawowa ko'ina neman abinci, In ba su sami abin da ya ishe su ba, Sukan yi gunaguni.

¹⁶Amma zan raira waƙa a kan ikonka, Kowace safiya zan raira waƙa da ƙarfi Ga zancen madawwamiyar ƙaunarka. Kai mafaka ne a gare ni, Wurin ɓuya a kwanakin wahala.

¹⁷Zan yabe ka, mai tsarona, Allah ne mafakata, Allah wanda ya ƙaunace ni.