Read hausa ZABURA 63 Bible Online

ZABURA 63 - hausa bible

ZABURA 63

¹Ya Allah, kai ne Allahna, Ina sa zuciya gare ka. Duk niyyata ta nemanka ce, Raina yana ƙishinka, Kamar bussasshiyar ƙasa, Wadda ta zozaye, ba ta da ruwa.

²Bari in gan ka a tsattsarkan wurinka, In dubi ɗaukakarka da darajarka.

³Madawwamiyar ƙaunarka ta fi rai kansa, Saboda wannan zan yabe ka.

⁴Muddin raina, zan yi maka godiya, Zan ta da hannuwana sama, in yi addu'a gare ka.

⁵Raina zai yi liyafa, yă ƙoshi sosai, Ni kuwa zan raira waƙoƙin murna na yabo a gare ka.

⁶Sa'ad da nake kwance a gadona na tuna da kai, Dare farai ina ta tunawa da kai,

⁷Domin kai kake taimakona kullayaumin. Da murna, nake raira waƙa, A inuwar fikafikanka,

⁸Raina yana manne maka, Ikonka yana riƙe da ni.

⁹Waɗanda suke ƙoƙari su kashe ni, Za su gangara zuwa lahira,

¹⁰Za a kashe su cikin yaƙi, Kyarketai kuwa za su cinye gawawwakinsu.

¹¹Sarki zai yi farin ciki ga Allah, Duk waɗanda suka yi alkawarai da sunan Allah Za su yi murna, Amma za a rufe bakunan maƙaryata.