Read hausa ZABURA 74 Bible Online

ZABURA 74 - hausa bible

ZABURA 74

¹Don me ka yashe mu haka, ya Allah? Za ka yi ta fushi da jama'arka har abada ne?

²Ka tuna da jama'arka waɗanda ka zaɓa su zama naka tuntuni, Ka tuna da jama'arka waɗanda ka fansa, Don su zama kabilarka. Ka tuna da Dutsen Sihiyona, inda zatinka yake!

³Ka zo, ka yi yawo a wannan kufai, Abokan gābanmu sun lalatar da kome na cikin Haikali!

⁴Abokan gābanka suka yi sowa ta nasara A inda akan sadu da kai, Sun ƙwace Haikalin.

⁵Suna kama da masu saran itace, Suna saran itatuwa da gaturansu.

⁶Da gaturansu da gudumarsu, Sun ragargaje ƙyamaren da aka yi da katako.

⁷Sun sa wa Haikalinka wuta, Sun ƙazantar da wurin da akan yi maka sujada, Sun farfashe shi duk.

⁸Sun yi niyya su murƙushe mu sarai, Sun ƙone kowane tsattsarkan wuri na ƙasar.

⁹Ba sauran tsarkakan alamu, Ba sauran annabawan da suka ragu, Ba kuwa wanda ya san ƙarewar wannan.

¹⁰Ya Allah, har yaushe abokan gābanmu za su yi ta yi mana ba'a? Za su yi ta zargin sunanka har abada ne?

¹¹Me ya sa ka ƙi taimakonmu? Ka tasar musu ka hallaka su!

¹²Amma ya Allah, kai ne Sarkinmu tun daga farko, Ka yi nasara da duniya.

¹³Da ƙarfin ikonka ka raba teku, Ka farfashe kawunan dodannin ruwa,

¹⁴Ka ragargaje kawunan kadduna, Ka kuwa ba mutanen hamada su ci.

¹⁵Ka sa ruwan maɓuɓɓugai ya yi gudu, Ka sa manyan koguna su ƙafe.

¹⁶Ka halicci yini da dare, Ka sa rana da wata a wurarensu.

¹⁷Ka yi wa duniya kan iyaka, Ka kuwa yi lokatan damuna da na rani.

¹⁸Amma ka tuna fa, ya Ubangiji, abokan gābanka suna yi maka ba'a, Su wawaye ne waɗanda suke raina ka.

¹⁹Kada ka ba da jama'arka marasa taimako A hannun mugayen maƙiyansu, Kada ka manta da jama'arka waɗanda ake tsananta musu!

²⁰Ka tuna da alkawarin da ka yi mana, Akwai tashin hankali a kowane lungu mai duhu na ƙasar!

²¹Kada ka bari a kori waɗanda ake zalunta, Amma bari matalauta da masu mayata su yabe ka.

²²Ka tashi, ya Allah, ka kāre kanka! Ka tuna fa, marasa tsoronka suna ta yi maka ba'a dukan yini!

²³Kada ka manta da hargowar maƙiyanka, Kada ka manta da hayaniyar da magabtanka suke ta yi.