Read hausa ZABURA 76 Bible Online

ZABURA 76 - hausa bible

ZABURA 76

¹Allah sananne ne a Yahuza, Mashahuri ne kuma a Isra'ila.

²Wurin zamansa yana Urushalima, A dutsen Sihiyona zatinsa yake.

³A can yake kakkarya kiban abokan gāba, Da garkuwoyinsu, da takubansu, i, har da dukan makamansu.

⁴Ina misalin darajarka, ya Allah! Ina misalin ɗaukakarka a sa'ad da ka komo daga kan duwatsu, Daga korar abokan gābanka!

⁵An kwashe ganimar sojojinsu masu ƙarfin hali, Yanzu suna barci, barcin matattu, Ba waninsu da ya ragu, Da zai yi amfani da makamansa.

⁶Sa'ad da ka fafare su, ya Allah na Yakubu, Dawakansu da mahayansu suka fāɗi matattu.

⁷Amma mutane suna jin tsoronka! Wa zai iya tsayawa a gabanka Sa'ad da ka yi fushi?

⁸Daga Sama ka sanar da shari'arka, Duniya ta tsorata, ta yi tsit,

⁹Sa'ad da ka tashi domin ka yanke hukunci, Domin ka ceci waɗanda ake zalunta a duniya.

¹⁰Hasalar mutane ba ta ƙara kome, sai dai ta ƙara maka yabo. Waɗanda suka tsira daga yaƙe-yaƙe za su kiyaye idodinka.

¹¹Ku ba Ubangiji Allahnku abin da kuka alkawarta masa, Dukanku sauran al'umma da kuke kusa, ku kawo masa kyautai. Allah yakan sa mutane su ji tsoronsa,

¹²Yakan ƙasƙantar da shugabanni masu girmankai, Ya tsoratar da manyan sarakuna.