Read hausa ZABURA 77 Bible Online

ZABURA 77 - hausa bible

ZABURA 77

¹Na ta da murya, na yi kuka ga Allah, Na ta da murya, na yi kuka, ya kuwa ji ni.

²A lokacin wahala, nakan yi addu'a ga Ubangiji, Dukan dare nakan ɗaga hannuwana sama in yi addu'a, Amma ban sami ta'aziyya ba.

³Lokacin da na tuna da Allah na yi ajiyar zuciya. Sa'ad da nake tunani, Nakan ji kamar in fid da zuciya.

⁴Ba ya barina in yi barci, Na damu har na kāsa magana.

⁵Na yi tunanin kwanakin da suka wuce, Nakan kuma tuna da shekarun da suka wuce da daɗewa.

⁶Dare farai ina ta tunani mai zurfi, A cikin tunani nakan yi wa kaina tambaya.

⁷A kullum ne Ubangiji zai yashe ni? Ba kuma zai ƙara yin murna da ni ba?

⁸Ya daina ƙaunata ke nan? Alkawarinsa ba shi da wani amfani?

⁹Allah ya manta da yin jinƙai ne? Fushinsa ya maye matsayin juyayinsa ne?

¹⁰Sa'an nan sai na ce, “Abin da ya fi mini zafi duka, Shi ne ikon Maɗaukaki ya ragu.”

¹¹Zan tuna da manyan ayyukanka, ya Ubangiji, Zan tuna da al'amura masu banmamaki da ka aikata a dā.

¹²Zan tuna da dukan abubuwan da ka yi, Zan yi tunani a kan dukan ayyukanka.

¹³Dukan abin da kake yi mai tsarki ne, ya Allah! Ba wani allah mai girma kamarka!

¹⁴Kai ne Allah wanda kake aikata al'ajabai, Ka nuna ikonka cikin sauran al'umma.

¹⁵Ta wurin ikonka ka fanshi jama'arka, Zuriyar Yakubu da ta Yusufu.

¹⁶Ya Allah, sa'ad da ruwaye suka gan ka, sai su tsorata, Zurfafan teku kuma suka yi rawar jiki.

¹⁷Gizagizai suka zubo da ruwa, Aka buga tsawa daga sama, Aka kuwa yi walƙiya ko'ina.

¹⁸Bugawar tsawarka ta gama ko'ina, Hasken walƙiya ya haskaka dukan duniya, Duniya ta yi rawa, ta girgiza, ta kaɗu.

¹⁹Ka yi tafiya a teku, Ka haye teku mai zurfi, Amma ba a ga shaida inda ka taka ba.

²⁰Ka bi da jama'arka yadda makiyayi yake yi, Musa da Haruna suke lura da su.