Read hausa ZABURA 9 Bible Online

ZABURA 9 - hausa bible

ZABURA 9

¹Zan yabe ka da zuciya ɗaya, ya Ubangiji, Zan hurta dukan abubuwa masu banmamaki da ka yi.

²Zan raira waƙa da farin ciki sabili da kai, Zan raira yabo gare ka, ya Maɗaukaki!

³Magabtana sun jā da baya da suka gan ka, Suka faɗi, suka mutu.

⁴Kai da kake alƙali mai adalci Ka zauna a kursiyinka, Ka kuwa yi shari'ar da ta yi mini daidai.

⁵Ka kā da arna, Ka kuma hallakar da mugaye, Ba kuwa za a ƙara tunawa da su ba.

⁶An hallaka abokan gābanmu har abada, Ka lalatar da biranensu, An kuma manta da su sarai.

⁷Amma Ubangiji sarki ne har abada, Ya kafa kursiyinsa domin yin shari'a.

⁸Yana mulkin duniya da adalci, Yana yi wa mutane shari'a da gaskiya.

⁹Ubangiji mafaka ne ga waɗanda ake zalunta, Wurin ɓuya a lokatan wahala.

¹⁰Waɗanda suka san ka za su amince da kai, ya Ubangiji, Ba za ka ƙyale duk wanda ya zo gare ka ba.

¹¹Ku yabi Ubangiji, shi da yake mulki a Sihiyona! Ku faɗa wa kowace al'umma abin da ya yi!

¹²Allah yana tunawa da waɗanda suke shan wuya, Ba ya mantawa da kukansu, Yana kuma hukunta waɗanda suke cutarsu.

¹³Ya Ubangiji, ka yi mini jinƙai! Ka dubi irin wulakancin da maƙiya suka yi mini! Ka kuɓutar da ni daga mutuwa, ya Ubangiji,

¹⁴Domin in iya tsayawa a gaban jama'ar Urushalima, In faɗa musu dukan abin da ya sa nake yabonka. Zan yi farin ciki saboda ka cece ni.

¹⁵Arna sun haƙa rami sun kuwa fāɗa ciki, Sun ɗana tarko, ya kuwa kama su.

¹⁶Ubangiji ya bayyana kansa ta wurin shari'arsa mai adalci, Mugaye sun kama kansu da abubuwan da suka aikata.

¹⁷Mutuwa ce maƙarar dukan mugaye, Da dukan waɗanda suke ƙin Allah.

¹⁸Ba kullum ne ake ƙyale masu bukata ba, Ba za a danne sa zuciyar waɗanda ake zalunta ba har abada.

¹⁹Ka zo, ya Ubangiji! Kada ka bari mutane su gagare ka! Ka kawo arna a gabanka, ka hukunta su.

²⁰Ka sa su ji tsoro, ya Ubangiji, Ka sa su sani su mutane ne kawai.