Read hausa ZABURA 91 Bible Online

ZABURA 91 - hausa bible

ZABURA 91

¹Duk wanda ya je wurin Maɗaukaki Zai zauna lafiya, Duk wanda yake zaune a inuwar Mai Iko Dukka,

²Ya iya ce wa Ubangiji, “Kai ne kāriyata, da mai kiyaye ni! Kai ne Allahna, a gare ka nake dogara!”

³Hakika zai kiyaye ka Daga dukan hatsarorin da ka ɓoye, Daga kuma dukan mugayen cuce-cuce.

⁴Zai rufe ka da fikafikansa, Za ka zauna lafiya a ƙarƙashinsu. Amincinsa zai tsare ka, ya kiyaye ka.

⁵Ba za ka ji tsoron hatsarori da dare ba, Ko fāɗawar da za a yi maka da rana,

⁶Ko annobar da take aukowa da dare, Ko mugayen da suke kisa da tsakar rana.

⁷Mutum dubu za su fāɗi daura da kai, Dubu goma kuma za su fāɗi dama da kai, Amma kai, ba za a cuce ka ba.

⁸Da idonka za ka duba, Ka ga yadda ake hukunta wa mugaye.

⁹Domin ka ɗauka Ubangiji yake kiyaye ka, Maɗaukaki ne yake tsaronka,

¹⁰To, ba bala'in da zai same ka, Ba za a yi wa gidanka aikin ƙarfi da yaji ba.

¹¹Allah zai sa mala'ikunsa su lura da kai, Za su kiyaye ka duk inda za ka tafi.

¹²Za su ɗauke ka a hannuwansu, Don kada ka buga ƙafarka a dutse.

¹³Za ka tattake zakoki da macizai, Za ka tattake zakoki masu zafin rai Da macizai masu dafi.

¹⁴Allah ya ce, “Zan ceci waɗanda suke ƙaunata, Zan kiyaye waɗanda suka san ni.

¹⁵Sa'ad da suka kira gare ni, zan amsa musu, Zan kasance tare da su sa'ad da suke shan wahala, Zan cece su in girmama su.

¹⁶Zan ba su tsawon rai lada, Hakika kuwa zan cece su.”