Read hausa ZABURA 99 Bible Online

ZABURA 99 - hausa bible

ZABURA 99

¹Ubangiji Sarki ne, Mutane suna rawar jiki, Yana zaune a bisa kursiyinsa a bisa kerubobi, Duniya ta girgiza.

²Ubangiji mai iko ne a Sihiyona, Shi ne yake mulki a bisa dukan sauran al'umma.

³Kowa da kowa zai yabi sunansa mai girma, Maɗaukaki, Mai Tsarki ne shi!

⁴Maɗaukaki kana ƙaunar abin da yake daidai, Ka kawo adalci cikin Isra'ila, Ka kawo adalci da gaskiya.

⁵Ku yabi Ubangiji Allahnmu, Ku yi sujada a gaban kursiyinsa! Mai Tsarki ne shi!

⁶Musa da Haruna firistocinsa ne, Sama'ila kuma mai yi masa sujada ne. Suka yi kira ga Ubangiji, ya kuwa amsa musu.

⁷Ya yi magana da su daga girgije, Suka yi biyayya da dokoki da umarnai da ya ba su.

⁸Ya Ubangiji Allahnmu, ka amsa wa jama'arka, Ka nuna musu, kai Allah ne mai yin gafara, Amma kakan hukunta su saboda zunubansu.

⁹Ku yabi Ubangiji Allahnmu, Ku yi sujada a bisa dutsensa mai tsarki! Ubangiji Allahnmu Mai Tsarki ne!