Read hausa KARIN MAGANA 11 Bible Online

KARIN MAGANA 11 - hausa bible

KARIN MAGANA 11

¹Ubangiji yana ƙin masu yin awo da ma'aunin zamba, amma yana farin ciki da masu yin awo da ma'auni na gaskiya.

²Masu girmankai za a kunyatar da su nan da nan. Hikima ce mutum ya zama mai kamewa.

³Mutanen kirki su ne gaskiya takan bi da su. Rashin aminci kuwa yana hallaka maciya amana.

⁴Dukiya ba ta da wani amfani a ranar mutuwa, amma adalci zai hana ka mutuwa.

⁵Gaskiya takan sa zaman mutanen kirki ya zama a sawwaƙe, amma mugun mutum shi yake kā da kansa da kansa.

⁶Adalci yakan ceci amintaccen mutum, amma marar aminci, haɗamarsa ce take zamar masa tarko.

⁷Mugun mutum yakan mutu da burinsa. Dogara ga dukiya bai amfana kome ba.

⁸Akan kiyaye adali daga wahala, amma takan auko wa mugu.

⁹Mutane sukan sha hasara ta wurin maganar marasa tsoron Allah, amma hikimar adalai takan yi ceto.

¹⁰Birni yakan yi farin ciki saboda wadatar mutanen kirki, akwai kuma sowa ta farin ciki sa'ad da mugaye suka mutu.

¹¹Biranen da adalai suke cikinsu sukan ƙasaita, amma maganganun mugaye sukan hallakar da su.

¹²Wauta ce a yi wa waɗansu maganar raini, amma mutum mai la'akari yakan kame bakinsa.

¹³Ba wanda zai yarda ya faɗi asirinsa ga matsegunci, amma za ka amince wa amintaccen mutum.

¹⁴Al'ummar da ba ta da masu ja mata gora, za ta fāɗi. Yawan mashawarta yake kawo zaman lafiya.

¹⁵Wanda ya ɗaukar wa baƙo lamuni zai yi da na sani, zai fi maka sauƙi idan ba ruwanka.

¹⁶Mace mai mutunci abar girmamawa ce, amma azzalumai za su sami dukiya.

¹⁷In ka yi alheri, kanka ka samar wa tagomashi, in kuwa ka yi mugunta, kanka ka cutar.

¹⁸A ainihi mugaye ba su cin ribar kome, amma idan ka yi abin da yake daidai, ka tabbata za a sāka maka da alheri.

¹⁹Mutumin da ya yi niyyar aikata abin da yake daidai zai rayu, amma mutumin da ya dukufa ga aikata mugunta zai mutu.

²⁰Ubangiji yana ƙin masu muguwar niyya, amma yana murna da waɗanda suke aikata abin da yake daidai!

²¹Ka tabbata fa za a hukunta mugaye, amma ba za a hukunta adalai ba.

²²Kome kyan mace idan ba ta da kangado, tana kamar zoben zinariya a hancin alade.

²³Abin da mutanen kirki suke so kullum yakan jawo alheri, idan mugaye sun sami biyan bukatarsu kowa zai yi ɓacin rai.

²⁴Waɗansu mutane sukan kashe kuɗinsu hannu sake, duk da haka arzikinsu sai ƙaruwa yake yi. Waɗansu kuwa saboda yawan tsumulmularsu sukan talauce.

²⁵Ka yi alheri za ka arzuta. Ka taimaki waɗansu, su kuma za su taimake ka.

²⁶Mutane sukan la'anci mai ɓoye hatsi, yana jira ya yi tsada, amma sukan yabi wanda yake sayar da nasa.

²⁷Idan nufe-nufenka na kirki ne za a girmama ka, amma idan kai mai neman tashin hankali ne, to, abin da zai same ka ke nan.

²⁸Adalai za su arzuta, kamar ganyaye da bazara, amma waɗanda suke dogara ga dukiyarsu za su karkaɗe kamar ganyaye da kaka.

²⁹Mutumin da yake jawo wa iyalinsa wahala, ƙarshensa talaucewa. Wawaye za su zama barorin masu hikima a ko yaushe.

³⁰Adalci yana rayar da mutum, wanda yake da hikima kuma yakan ceci rayuka.

³¹Idan an sāka wa mutumin kirki da alheri a duniya, hakika za a hukunta wa mugaye da masu zunubi.