Read hausa KARIN MAGANA 16 Bible Online

KARIN MAGANA 16 - hausa bible

KARIN MAGANA 16

¹Mutane sun iya yin shirye-shiryensu, amma cikawa ta Ubangiji ce.

²Za ka yi tsammani kowane abu da ka yi daidai ne, amma Ubangiji yana auna manufarka.

³Ka roƙi Ubangiji, ya sa albarka ga shirye-shiryenka, za ka kuwa yi nasara cikin aikata su.

⁴Kowane abu da Ubangiji ya yi yana da makoma, makomar mugun kuwa hallaka ce.

⁵Ubangiji yana ƙin kowane mutum da yake fariya. Irin wannan mutum ba zai kuɓuta daga hukunci ba.

⁶Ka zama mai biyayya da aminci, Allah kuwa zai gafarta maka zunubinka. Ka dogara ga Ubangiji, ba wani mugun abu da zai same ka.

⁷Lokacin da ka yi abin da Ubangiji yake so, ka iya mai da maƙiyanka su zama abokai.

⁸Gara ka sami kaɗan ta hanyar gaskiya, da ka tara abu mai yawa ta hanyar zamba.

⁹Kana iya yin shirye-shiryenka, amma Allah ne yake bi da kai cikin ayyukanka.

¹⁰Sarkin da yakan yi magana ta wurin ikon Allah, a ko yaushe yakan yanke shawarar da yake daidai.

¹¹Ubangiji yana son ma'aunai su zama na gaskiya, kowane abin sayarwa kuma ya zama daidai.

¹²Sarakuna ba za su iya jurewa da mugunta ba, gama adalci yake sa hukuma ta yi ƙarfi.

¹³Sarki yana so ya ji gaskiya, zai kuwa ƙaunaci mutanen da suke faɗar gaskiya.

¹⁴Mutum mai hikima yakan yi ƙoƙari ya faranta zuciyar sarki. Idan kuwa sarki ya hasala mai yiwuwa ne a kashe wani.

¹⁵Alherin sarki kamar gizagizai ne masu kawo ruwan sama a lokacin bazara, akwai rai a ciki.

¹⁶Yana da kyau, ya kuma fi kyau a sami hikima da ilimi fiye da zinariya da azurfa.

¹⁷Mutumin kirki yana tafiya a hanyar da ta kauce wa mugunta, saboda haka ka kula da inda kake tafiya, za ta ceci ranka.

¹⁸Girmankai jagora ne zuwa ga hallaka, fāriya kuwa zuwa ga fāɗuwa.

¹⁹Gara ka zama ɗaya daga cikin matalauta masu tawali'u, da ka zama ɗaya daga cikin masu girmankai, har da za ka sami rabo daga cikin ganimarsu.

²⁰Ka mai da hankali ga abin da aka koya maka, za ka yi nasara. Ka dogara ga Ubangiji, za ka yi farin ciki.

²¹Mutum mai hikima, wanda ya isa mutum, akan san shi ta wurin haziƙancinsa, kamar yadda kalmominsa suke da daɗi, haka ma rinjayarsa take.

²²Hikima maɓuɓɓugar rai ce ga mai hikima, amma ɓata lokaci ne a yi ƙoƙarin koya wa dakikai.

²³Mai hikima yakan yi tunani kafin ya yi magana, abin da ya faɗa yakan yi rinjaye ƙwarai.

²⁴Kalmomi masu daɗi suna kama da zuma, suna da daɗin ɗanɗana, suna kuma da amfani domin lafiyarka.

²⁵Hanyar da kake tsammani ita ce daidai, za ta kai ka ga hallaka.

²⁶Marmarin cin abinci yakan sa ɗan ƙodago ya yi aiki da ƙwazo, domin yana so ya ci ya ƙoshi.

²⁷Mutumin da yake jin daɗin yin mugunta yakan tafi yawon nemanta, mugayen maganganunsa ƙuna suke kamar wuta.

²⁸Mugaye sukan baza jita-jita, suna zuga tashin hankali, suna raba aminai.

²⁹Mutum mai ta da zaune tsaye yakan ruɗi abokansa, ya kai su ga bala'i.

³⁰Ka kula da mutane masu murguɗa baki suna kaɗa gira a kanka, sun yi tunanin wani mugun abu ke nan.

³¹Furfurar tsufa rawanin daraja ce, sakamako ne ga ran mai adalci.

³²Ya fi kyau ka zama mai haƙuri da ka zama mai ƙarfi. Ya fi kyau ka iya mallakar kanka fiye da mallakar birane.

³³Mutane sukan jefa kuri'a don su san nufin Allah, amma Allah da kansa ne yake ba da amsa.