Read hausa KARIN MAGANA 21 Bible Online

KARIN MAGANA 21 - hausa bible

KARIN MAGANA 21

¹Ubangiji ne yake mallakar tunanin sarki a sawwaƙe kamar yadda yake yi da ruwan rafi.

²Ko da a ce dukan abin da kake yi daidai ne, ka tuna fa Ubangiji ya san manufarka.

³Ubangiji ya fi so ka yi abin da yake daidai, mai kyau kuma, fiye da ka miƙa masa hadayu.

⁴Girmankai da fāriya suke bi da mugaye, wannan kuwa zunubi ne.

⁵Yin shiri a tsanaki zai kai ka ga biyan bukatarka, idan kuwa ka cika gaggawa ba za ka sami abin da zai ishe ka ba.

⁶Dukiyar da aka tara ta hanyar rashin gaskiya takan ƙare nan da nan, takan kuma kai ga mutuwa.

⁷Mugaye, tasu ta ƙare saboda muguntarsu, gama sun ƙi yin abin da yake daidai.

⁸Mutane masu laifi sukan bi ta karkatacciyar hanya, marasa laifi kuwa suna aikata abin da yake daidai.

⁹Gara zama a saƙo da zama a gida ɗaya tare da mace mai mita.

¹⁰Mugaye sun zaƙu su aikata mugunta, ba su yi wa kowa jinƙai.

¹¹Sa'ad da aka hukunta mai girmankai, ko marar tunani yakan koyi wani abu, mutum mai hikima yakan koyi abin da ake koya masa.

¹²Adali ya san tunanin mugaye, yakan kuwa zama sanadin lalacewarsu.

¹³Idan ka ƙi jin kukan matalauci, naka kukan da kake yi na neman taimako, ba za a ji ba.

¹⁴Kyauta a asirce takan kwantar da zuciyar wanda yake fushi da kai.

¹⁵Sa'ad da aka yi adalci mutanen kirki sukan yi murna, amma mugaye sukan yi baƙin ciki.

¹⁶Mutuwa tana jiran wanda ya ƙi bin hanyar hankali.

¹⁷Sa kai cikin nishaɗi, wato shan ruwan inabi, da cin abinci mai tsada, ba zai bar ka ka tara dukiya ba.

¹⁸Wahalar da mugaye suke so su jawo wa mutanen kirki, za ta koma kansu.

¹⁹Gara ka zauna a hamada, da ka zauna tare da mace mai mita, mai yawan kai ƙara.

²⁰Mutane masu hikima suna zaune da wadata da nishaɗi, amma wawaye da zarar sun sami kuɗi sukan kashe su nan da nan.

²¹Ka yi alheri ka yi aminci, za ka yi tsawon rai waɗansu kuma za su girmama ka, su yi maka abin da yake daidai.

²²Sarkin yaƙi mai wayo yakan ci birnin da jarumawa suke tsaro, ya rushe garun da suke taƙama da shi.

²³Idan ba ka so ka shiga wahala, ka lura da abin da kake faɗa.

²⁴Ba kalmar da ta fi “fāɗin rai” dacewa ga mutum mai girmankai, mai fāriya marar tunani.

²⁵Malalacin mutumin da ya ƙi yin aiki, kansa yake kashewa.

²⁶Duk abin da yake tunani dukan yini, shi ne a kan abin da yake so ya samu. Amma adali ko ta ƙaƙa yakan bayar da hannu sake.

²⁷Ubangiji yana ƙin hadayar da mugaye suka miƙa masa, tun ba wadda suka miƙa ta da mugun nufi ba.

²⁸Ba a gaskata shaidar maƙaryaci, amma mutumin da yakan yi tunani a kan al'amura, akan karɓi tasa.

²⁹Adali ya tabbatar da kansa, haka ma mugun mutum yakan yi da'awa, cewa shi ma ya tabbatar da kansa.

³⁰Hikima, da haziƙanci, da basira, ba kome suke ba gāba da Ubangiji.

³¹Kana iya shirya dawakai don zuwa yaƙi, amma nasara ta Ubangiji ce.