Read hausa KARIN MAGANA 22 Bible Online

KARIN MAGANA 22 - hausa bible

KARIN MAGANA 22

¹Idan ya zama dole ne ka zaɓa tsakanin kyakkyawan suna ko dukiya, to, ka zaɓi kyakkyawan suna, tagomashi kuma ya fi azurfa da zinariya.

²Ba bambanci tsakanin mawadaci da matalauci, gama Ubangiji ne ya halicce su duka.

³Mutum mai hankali, in ya ga wahala tana zuwa yakan kauce mata, amma shashasha yakan kutsa kai ciki, daga baya ya yi da na sani.

⁴Kana da tsoron Ubangiji, ka yi tawali'u, za ka arzuta, ka ɗaukaka, ka sami tsawon rai.

⁵Idan kana ƙaunar ranka ka nisanci tarkunan da aka kafa a hanya don su kama mugaye.

⁶Ka koya wa yaro yadda zai yi zamansa, zai kuwa tuna da ita dukan kwanakinsa.

⁷Matalauta su ne bayin attajirai, bawa ne kai ga wanda ka ci bashi a gare shi.

⁸In ka shuka rashin gaskiya masifa ce za ta tsiro, wato hukunci mai tsanani wanda zai hallakar da kai.

⁹Ka zama mai hannu sake, ka riƙa ba matalauta abincinka, za a sa maka albarka saboda haka.

¹⁰Ka rabu da mutum mai fāriya, mai gardama, mafaɗaci, hatsaniya za ta ƙare.

¹¹In ka yi ladabi za ka zama aminin sarki, gama yana ƙaunar amintaccen mutum.

¹²Ubangiji yana lura ya ga an riƙe gaskiya sosai ta wurin ƙin yarda da maganganun ƙarya.

¹³Malalaci yakan yi zamansa a gida, yakan ce, “Zaki zai kama ni in na fita waje.”

¹⁴Zina tarko ce, takan kama waɗannan waɗanda Ubangiji yake fushi da su.

¹⁵Halin yara ne su yi wauta da waɗansu abubuwa na rashin kula, amma tsumagiya za ta koya musu abin da ya fi kyau.

¹⁶Idan attajirai kake yi wa kyauta, kana kuma zaluntar matalauta don ka arzuta, kai kanka za ka talauce.

¹⁷Ka kasa kunne zan koya maka abin da masu hikima suka faɗa, yi nazari a kan koyarwarsu.

¹⁸Za ka yi murna in ka tuna da su, ka iya faɗarsu.

¹⁹Ina so ka dogara ga Ubangiji, don haka zan faɗa maka su yanzu.

²⁰Na rubuta maka karin magana, suna ƙunshe da ilimi da kyakkyawar shawara.

²¹Zan koya maka ainihin gaskiya, domin sa'ad da aka aike ka ka nemo ta, za ka iya kawo amsa daidai.

²²Kada ka ƙwari matalauci don ka fi shi, kada ka ƙwari wanda ba shi da mai taimako a gaban shari'a.

²³Ubangiji zai yi magana dominsu a kan shari'ar da suke yi, ya nemi ran duk wanda yake neman rayukansu.

²⁴Kada ka yi abuta da mutane masu zafin fushi, ko masu zafin rai.

²⁵Mai yiwuwa ne ka koyi irin ɗabi'unsu, har ka kasa sākewa.

²⁶Kada ka yi alkawarin ɗaukar wa wani lamuni,

²⁷gama idan ka kāsa biya har gadonka ma za su ɗauke.

²⁸Kada ka kawar da shidar kan iyaka wadda kakanninka suka kafa.

²⁹Ka nuna mini mutumin da yake aiki mai kyau, ni kuwa in nuna maka mutumin da ya fi duka, wanda ya cancanci ya zauna tare da sarakuna.