Read hausa KARIN MAGANA 26 Bible Online

KARIN MAGANA 26 - hausa bible

KARIN MAGANA 26

¹Yabo bai dace da wawa ba, kamar yadda dusar ƙanƙara ba ta dace da lokacin zafi ba, ko ruwan sama a lokacin girbi.

²La'ana ba za ta kama ka ba, sai dai in ka cancance ta. Tana kamar tsuntsayen da suke firiya da dare ba za su sauka ba.

³Sai ka fyaɗi doki, ka sa wa jaki linzami, wawa kuma sai ka doke shi.

⁴Idan ka amsa tambayar wauta, ka zama wawa daidai da mutumin da ya yi tambayar.

⁵Ka amsa wauta ga tambayar wauta, wanda ya yi tambayar zai gane wawancinsa.

⁶Mutumin da ya sa wawa ya isar masa da saƙo ya datse ƙafafunsa, yana nemar wa kansa wahala.

⁷Wawa yakan yi amfani da karin magana kamar yadda tauyayyen mutum yake amfani da ƙafafunsa.

⁸Wanda ya yabi wawa yana kama da wanda ya ɗaura dutse a majajjawa.

⁹Karin magana a bakin wawa kamar sukar ƙaya ce a hannun mai maye.

¹⁰Wanda ya ɗauki wawa aiki yana cutar duk wanda aikin ya shafa.

¹¹Wawan da yake maimaita aikin wautarsa yana kama da kare mai yin amai ya koma ya tanɗe.

¹²Gwamma riƙaƙƙen wawa da mutum mai ganin kansa mai hikima ne.

¹³Don me malalaci yakan kasa fita daga gida? Zaki yake tsoro?

¹⁴Malalaci yana ta jujjuyawa a gadonsa kamar yadda ƙyauren ƙofa take juyawa.

¹⁵Malalaci yana sa hannu cikin ƙwaryar abinci, amma ya kāsa kaiwa bakinsa.

¹⁶Malalaci yana ganin kansa mai hikima ne fiye da mutum bakwai waɗanda suke da dalilai a kan ra'ayinsu.

¹⁷Mutumin da ya tsoma baki cikin jayayyar da ba ta shafe shi ba sa'ad da yake wucewa, yana kama da mutum wanda yake kama kare a kunne.

¹⁸Mutum wanda yakan ruɗi maƙwabcinsa sa'an nan ya ce, wasa yake yi kawai, yana kama da mahaukaci wanda yake wasa da wuta, da kibau, da mutuwa.

²⁰Idan ba itace wuta takan mutu, haka kuma idan ba mai gulma ba za a yi jayayya ba.

²¹Kamar yadda gawayi yake ga garwashin wuta, itace kuma ga wuta, haka mai gardama yake ga jayayya.

²²Kamar yadda lomar abinci mai daɗi takan gangara can cikin ciki haka maganar mai gulma take.

²³Bakin da ba ya faɗar gaskiya, da zuciya mai ƙiyayya suna kama da kaskon da aka dalaye da azurfar da ba a tace ba.

²⁴Mai yin ƙiyayya yakan ɓoye ta da maganar bakinsa, yana kuma ƙunshe da munafunci.

²⁵Sa'ad da yake magana mai kyau kada ka gaskata shi, domin zuciyarsa tana cike da mugunta.

²⁶Ko da yake kila zai ɓoye ƙiyayyarsa, duk da haka muguntarsa za ta bayyana ga mutane.

²⁷Wanda ya haƙa ramin mugunta shi zai faɗa ciki, wanda kuma ya mirgino dutse, zai fāɗo a kansa.

²⁸Maƙaryaci yana ƙin wanda ya yi wa ƙarya, mai daɗin baki kuma yakan aikata ɓarna.