Read hausa KARIN MAGANA 31 Bible Online

KARIN MAGANA 31 - hausa bible

KARIN MAGANA 31

¹Wannan ita ce maganar sarki Lamuwel wadda uwarsa ta koya masa.

²“Mene ne, ɗana? Mene ne, ya ɗana ne cikina? Mene ne, ɗana na wa'adi?

³Kada ka ba da ƙarfinka ga mata, kada kuwa ka mai da hankali gare su, waɗanda suke hallaka sarakuna.

⁴Bai dace ba, ya Lamuwel, bai dace ba ko kaɗan, sarakuna su sha ruwan inabi, ko masu mulki su yi marmarin barasa,

⁵don kada su sha su manta da doka, su kuma kauce wa gaskiya a shari'ar waɗanda aka zalunta.

⁶A ba da barasa ga wanda yake cikin halin ƙaƙa naka yi, ruwan inabi kuma ga waɗanda suke cikin ɓacin rai.

⁷Bari ya sha don ya manta da talaucinsa, don kada kuma ya ƙara tunawa da ɓacin ransa.

⁸“Ka yi magana domin bebaye, domin kuma hakkin dukan waɗanda ba su da wani mataimaki.(1Sam 19.4; Ayu 29.12-17)

⁹Ka yi magana dominsu, ka yi shari'ar adalci, ka kiyaye hakkin matalauta da masu bukata.”

¹⁰Wa yake iya samun cikakkiyar mace? Darajarta ta fi ta lu'ulu'ai.

¹¹Mijinta yakan amince da ita, ba kuwa zai yi hasara ba.

¹²Takan yi masa alheri ba mugunta ba, dukan kwanakinta.

¹³Takan samo ulu da lilin, ta yi saƙa da hannuwanta da farin ciki.

¹⁴Takan kawo abincinta daga nesa, kamar fatake.

¹⁵Takan yi asubanci ta shirya wa iyalinta abinci, ta kuma shirya wa 'yan matan gidanta aike-aiken da za su yi.

¹⁶Takan lura da gona sosai kafin ta saya, da ribar da ta ci take dasa gonar inabi.

¹⁷Takan himmantu ta yi aiki tuƙuru.

¹⁸Ta sani akwai riba a cikin kasuwancinta. Fitilarta na ci dare farai.

¹⁹Da hannunta take kaɗi, tana kuma saƙa da hannuwanta.

²⁰Takan yi wa matalauta da masu fatara karamci.

²¹Ba ta jin tsoron lokacin sanyi gama 'ya'yanta duka suna da tufafi masu ƙauri.

²²Takan yi wa gadonta kayan shimfiɗa, tufafinta kuma na lilin ne mai laushi na shunayya.

²³Mijinta sananne ne a dandali, sa'ad da yake zaune tare da dattawan gari.

²⁴Takan yi riguna na lilin ta sayar, takan kuma sayar wa fatake da abin ɗamara.

²⁵Wadata da mutunci su ne suturarta. Ba ta jin tsoron tsufa.

²⁶Tana magana da hikima. Koyarwarta ta alheri ce.

²⁷Tana lura da al'amuran 'ya'yanta da kyau. Ba ruwanta da ƙyuya.

²⁸'Ya'yanta sukan tashi su gode mata, mijinta kuma yana yabonta.

²⁹Ya ce, “Mata da yawa sun yi abin yabo, amma ke kin fi su duka.”

³⁰Kayan tsari da jamali duk banza ne, amma mace mai tsoron Ubangiji, ita ce abar yabo.

³¹A yi mata cikakken yabo saboda ayyukanta, za a yabi ayyukanta a dandali.